Ilinniaqqiffinni soraarummeernissat ingerlaannassapput

Ilinniarnertuunngorniarfinni, inuussutissarsiutinut ilinniartitaanermi ilinniaqqiffinnilu ilinniartut aasaanerani atuanngiffeqalinnginnerminni misilitsinnerit soraarummeernerillu ingerlateqqaartariaqarpaat. Ilinniarfiit immikkut ittunik soraarummeerutinik aaqqissuinissamut akuerineqarput.

Allat qanillinagit, assatit errortukulakkit, napparsimaguillu angerlarsimagit. Oqartussanit innersuussutit taakku, sapaatit akunnerni arlalinni kingullerni ilikkarsimalikkagut, ilinniaqqiffinni atuartut soraarummiilerunik misilitsilerunilluunniit aamma malissavaat.

Ilinniaqqiffiit misilitsitsinissaannut soraarummeertitsinissaannullu nalunaarut Naalakkersuisut akuereqqammerpaat. Ilinniarnertuunngorniarfimmi, inuussutissarsiutinut ilinniartitaanerni aamma qaffasinnerusunik ilinniartitaanerni aallaavittut soraarummeersitsinerit pisarnertut nalinginnaasumik ingerlanneqassapput. Ilinniarfiilli pisariaqartillugu allannguinnissaminnut ammaanneqarput.

- Naalakkersuisut qujassutigiumavaat atuartut aamma ilinniagaqartut, angajoqqaat aamma sulisut suliaat annertuut ilinniarfinni ataatsimoorlutik maanna COVID-19 atuunnerata nalaani. Tamatumani aamma oqaloqatigiinnerit ingerlanneqartut ilinniartitaanernik ingerlatsivinnut soraarummeertarnissat aamma misilitsittarnissat aggersut pillugit. Ersersinneqarpoq pissutsit immikkut ittut atuuffigisaanni ataatsimoorsinnaasugut, Ilinniartitaanermut Naalakkersuisoq Ane Lone Bagger oqaaseqarpoq.

Aprilip 28-ani nalunaarut naapertorlugu misilitsinnerit soraarummeernerillu pisariaqavitsillugu qarasaasiakkut attaveqatigiiffitsigut ingerlanneqarsinnaapput. Nalunaarut tamaat uani atuarsinnaavat.

Ilinniaqqiffiit ataasiakkaat, covid-19 pissutigalugu pissutsit allanngornerini, misilitsinnerit soraarummeersitsinerillu allatut aaqqissuunnissaannut pisinnaatinneqalerput.

Ilinniarfiit ilaatigut malittarisassanik ilaatigut ukunani allannguisinnaapput ilassuteqarlutilluunniit:

  • Piffissaliussat, tamatumani aamma kinguartitsinerit
  • Soraarummeernerup ilusissaa, soorlu qarasaasiaq atorlugu misilitsinnerit
  • Misilitsissutip imarisaa
  • Misilitsinnerit, soraarummeernermi ilaasussat amerlassusissaat
  • Censoreqartitsineq
Powered by Labrador CMS