Ilinnialernissaraluaq taamaatinneqareersoq: Naluara qanoq iliussanerlunga

Niuernermi Ilinniarfimmi ilinniagaqarluni aallartittussaagaluaq Sermitsiaq.AG-mit oqaloqatigineqarpoq. Ilinnialernissamut ullut arfiniliinnanngortut nalunaarfigitippoq ilinniarnissaralua taamaatiinnarneqartoq. - Eqqorneqarujussuarpunga, oqarpoq

32-nik ukiulik Heidi Henningsen Nuummi Niuernermik Ilinniarfimmut atualerniarluni qinnuteqarpoq juunimi.

Atualernissamut akueritissimalluni atuarfimmit nalunaarfigineqarpoq aggustip aallartinnerani, septembarip aappaani økonomi og ressourcestyringimi bachelorinngorniarnera aallartissasoq nalunaarfigineqarluni.

Heidi Henningsen atorfimminit suliunnaarpoq ilinniagaqalernissanilu qilanaaralugu. Atualernissaminut ullut arfiniliinnanngortut atuarfiup pisortaanit nalunaarfigineqarpoq ilinniarnissaralua taamaatiinnartoq, ilinniagassaa aningaasatigut suli qulakkeerneqarsimannginnera pissutigalugu.

Aallaqqaataaneeqqittariaqalersoq

Heidi Henningsenip Niuernermik Ilinniarfiup pisortaanit Christel Lund Bøjlerimit nalunaarfigineqarnini tupaallaatigaa.

- Pakatsisorujussuuvunga, tassami ilinniagaqalernissara siunnerfigisimagaluarpara. Taamaattumik aallaqqaataanit aallartittariaqalerpunga, suliffissarsiortariaqalerpungami. Maannakkorpiaq nalugallarpara qanoq iliussanerlunga, Sermitsiaq.AG-mut oqarpoq.

Ilinniagaqaqqinnissani pingaartillugu atorfiit qinnuteqarfigisani itigartittariaqarsimavai.

Niuernermik Ilinniarfiup pisortaa Christel Lund Bøjler Sermitsiaq.AG-mut nassuiaasareerpoq ilinniarfiit aallartittussaagaluit novembarimi 2017-mili atuarfimmit sulissutigineqarsimasut.

Niuernermik Ilinniarfik tallimanngormat Ilinniartitaanermut Naalakkersuisoqarfimmit aatsaat nalunaarfigineqarpoq ilinniarfiit aallartittussaraluit taamaatiinnartariaqartut.

Isumannaarneqareersimasussaagaluartoq

Ilinniagaqalernissamut akuersissummi paasititsisoqarsimasussaagaluartoq Heidi Henningsen isumaqarpoq.

- Ilinniagaq qinnuteqarfigigakkumi isumaqarsimagaluarpunga suna tamaat isumannaareersimasoq, pisulli takutippaat sunaluunniit isumannaarsimanngitsoq. Ilinnialernerup aallartiliivinnerani taamatut nalunaarfigineqarneq ingasappallaarpoq. Ilinniagassaraluatta aningaasartalerneqarsimannginnera uagutsinnut ilisimatitsissutigineqarsimannginnera tupinnarpoq, uungami killissallunga takorloorsimanngikkaluarpara, Heidi Henningsen oqarpoq.

Niuernermi Ilinniarfimmi holdit marluk arfinilinnik atuartoqartussaagaluarput. Taakku ilinniarnissaraluat taamaatiinnarneqarpoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS