ilinniartitaaneq

Ilinniakkanik killiliineq avaqqutaaruk

Danmarkimi ilinniakkanik killiliinissaq folketingimi amerlanerussuteqartut akuersissutigaat. Tamanna isumaqarpoq ilinniakkamik naammassisaqarsimagaanni qaffaseqataanillu ilinniaqqikkusulluni ukiut arfinillit aatsaat qaangiutereerpata ilinniartoqaqqissinnaalertoq. Nunatsinni ilinniagaq piareersimagaanni tamanna akornutaanngilaq

Peqqissaasut ukua ajornartorsiutitaqanngitsumik Danmarkimi ilinniaqqissinnaapput naak Danmarkimi ilinniakkanik killiliineq atuutsinneqalereeraluartoq

Ilinnikkamik killiliinissaq Danskit Naalakkersuisuisa Dansk Folkepartiit Socialdemokraatillu ikannerussuteqarlutik juullingitsiartoq akuersissutigaat. Tassa ilinniagaqareeraanni qaffaseqataanillu ilinniaqqikkukkaluarluni periarfissaajunnaapoq.

Januaarili naalersoq sukaterineq annikillisinneqarpoq, tassani ilinniakkap piareerneranit ukiut arfinillit qaangiuppata ilinniakkap qaffaseqataanik ilinniartoqaqqissinnaanngorlugu aalajangiisoqarmat.

Atuaruk: AVALAK: Ilinniarsinnaanerup killilerneqarnera suli ajornartorsiutaavoq

Ilinniartunilli Nunatsinneersunit tamanna avaqqutaarneqarsinnaavoq.

Siullermik Nunatsinni ilinniarsimagaani Danmarkimilu ilinnialerusulluni inatsimmit nutaamit eqqungaasoqassanngitsoq Ilinniartitaanermut, Kultureqarnermut, Ilisimatusarnermut, Ilageeqarnermullu Naalakkersuisoqarfiup Sermitsiaq.AG-mut mailikkut paasissutissiissutigaa.

Assersuutigalugu Nunatsinni peqqissaasutut ilinniarsimaguit Danmarkimi ajornartorsiutitaqanngitsumik nakorsatut ilinniaqqissinnaavutit.

Tamanna killormut aamma ippoq. Nunatsinni ilinniartitaanikkut killilersuisoqanngimmat maani ilinniartitsisunngorniarsinnaavutit naak Danmarkimi perorsaasutut ilinniagaqareeraluarlutik. Ilinniarnermusianulli inatsisit eqqumaffigineqartariaqarput, taakkumi allanngortinneqanngimmata.

Powered by Labrador CMS