Ilinniagaqarnersiutit pillugit inatsisissamut allannguutissaq
Ilinniartut kattuffiata Ili Ilip ilinniagaqarnersiutinut inatsisit nutaat sukanganerusut oqallisigitinniarpaat
Inatsisartut inatsisissamut allannguutissatut siunnersuutaat ilinniagaqarnersiutinut tunngasoq erseqqissarneqassaaq oqallisigineqarlunilu.
Ilinniartut kattuffiat Ili Ili taama isumaqarpoq, taamaattumillu unnummik oqalliffiusumik Nuummi kultoorip illorsuani Katuami aqagu sisamanngornermi aaqqissuussiniarpoq.
Ilinniartunut tamanut kinguneqartussaq
Tassani pineqarpoq ilinniagaqarnersiutit pillugit inatsisissamut allannguutissaq, 'ilinniarnerup nalaani ernialersuisarnermik atuutsitsilerneq aamma ilinniarnermi taarsigassarsianik akilersuinissamut maleruaqqusanik allannguineq erseqqissaanerlu.'
- Isumaqarpugut inatsisissatut allannguutissatut siunnersuut ilinniagaqarnersiutilinnut taamak annertutigisumik kinguneqarsinnaasoq qaammarsaatigineqarlunilu oqallisigineqaqqaartariaqaqqaarnissaa pingaaruteqarluinnartuusoq, Ili Ilimi siulittaasoq Vivi Vold, tusagassiuutinut nalunaarummi taamak oqarpoq.
Ilinniartitaanermut naalakkersuisoq, Nivi Olsen (D), inatsisissatut allannguutissamut siunnersuummik oqallittoqarnerani saqqummiisinneqassaaq, partiillu tamarmik peqataatitaqassallutik.
