Naligiissitaanerq

Ilinniagaqarfiit amerlanerusut angutinik amerlanerusunik pilerinnilersitsissapput

Ilisimatusarfimmi arnat ilinniagaqartut angutinit ikinnerpaamik pingasoriaammik amerlanerupput

Ilisimatusarfimmi arnat angutillu ilinniagaqartut amerlassutsimikkut nikingasorujussuupput

Inuussutissarsiutit aningaasaqarnerannik ilinniagaqarfik nutaaq, pinngortitalerinermik ilisimatusarnermi bachelorinngorniarfinngortussaq neriunartumillu piffissap ingerlanerani inatsisilerituutut ilinniagaqarfinngortussaq.

Kalaallit Nunaata Universitetiani, Ilisimatusarfimmi, ilinniagaqalersussanut tassa periarfissat ilaat, rektor Tine Parsillu neriuutigaa neqeroorutit nutaat tamakkua angutinik ilinniagaqartunik amerlanerusunik pilerinnilersitsissasust.

Arnat pingasoriaammik amerlanerusut

– Inuussutissarsiutit aningaasaqarnerannik ilinniagaqarfik HA aallartereerpoq, tassanilu takusinnaavarput holdimi siullermi angutit arnallu tiguneqarsimasut amerlaqatigiissut. Aamma ilimagaarput pinngortitalerinermik ilisimatusarnermi bachelorinngorniarfik, neriunartumik 2017-imi ilinniagaqarfiup aallartinnerani aallatissinnaasarput, angutinik ilinniagaqartunik amerlanerusunik pilerinnilersitsiumaartoq. Tamatumuunakkut kisitsisitigut maanna takussutissaativut allanngortinneqassapput, tassami arnat ilinniagaqartut angutinit ikinnerpaamik pingasoriaammik amerlanerummata, Tine Pars oqarpoq.

Fagit atituut

Arnat angutillu ilinniagaqartut amerlassutsimikkut taama nikingatiginerannut rektorip pissutaasutut ilimagaa Ilisimatusarfimmi ilinniagaqarnermut neqeroorutit amerlanerpaartaat manna tikillugu tassaanerusimammata fagit ilinniagaqarfiillu atituujusut.

Arlalinnik ilinniagaqarusuttut

– Tamakkua arnanut naleqqunnerugunarput, arnat amerlanertigut angutininngarnit atitunerusumik ilinniagaqarusuttarmata, akerlianilli angutit sammisaqarfinni atasiinnaanerusuni immikkut ilisimasalittut piginnaasaqarluartutut ilimanaateqarnerusarlutik. Tamannali imatut misissorsimanngilarput, uangali nammineq tamanna ilimagisariinnarpara, taanna erseqqissaavoq.

Ilinniagaqartut attatiinnarlugit

Tine Pars isumaqaraluartoq angutit arnallu naligiinnerusumik agguataarnerat ilinniagaqarfimmi avatangiisinik pitsaanerusunik pilersitsissasoq Ilisimatusarfik angutinik ilinniagaqartunik amerlanerusunik pilerinnilersitsiniarluni immikkut paasisitsiniaasimanngilaq. Taarsiullugu sammineqarput amerlanerusunik ilinniartoqalernissaq, minnerunngitsumillu ilinniagaqartut pioreersut attatiinnarnissaat.

Angutit unitsitsiinnartarput

– Takusinnaavarput angutit ilinniakkaminnik unitsitsiinnartartut arnanit amerlanerusut. Neriuutigaaralu ilaatigut ilinniagaqartut peqatigiiffiannik suleqateqarluarnitsigut kajumissuseqarneq ilinniakkamillu attassiinnarnissaq siunertaralugit immikkut ittunik iliuuseqarsinnaalluta, taamaattumik neriunarpoq taamaattutsiinnartarnerup pinngitsoortinnissaanut pikkorinnerulissasugut, rektor oqarpoq.

Kalaallit Nunaanni Naligiissitaanerup Ulluanut atatillugu Sermitsiaq normu 20 sammisamik ilanngussivoq. Aviisi ataani linki atorlugu pisiarisinnaavat

Powered by Labrador CMS