Ilimanami nunaqarfimmi aqutsisut: Ilimanaq takornarianik sullissisunut tunineqarpoq
Ilimanami takornariaqarnermik ineriartortitsineq nunaqarfimmi innuttaasunut annerusumik iluaqutaanngitsoq, takornarissanillu sullissisut nunani allamiut nunaqavissunut takornariaqarnermi suleqataasunut naleqqiullugit amerlanerujussuusut, nunaqarfimmi aqutsisut isumaqarput. Nunaqavissunilli sulisussarsiniarneq ajornakusoortorujussuusoq, World of Greenlandip pisortaa oqarpoq.
Ilulissani takornarissanik sullissisut annerpaartaartaat, World of Greenland A/S, Grønlands Rejsebureau-mit pigineqartoq, umiarsuit qulimiguullillu atorlugit takornariartitsisarpoq pisuttuartitsisarlunilu.
Taassuma saniatigut unnuisarfiit Eqi Clacier Lodge, Iglo Lodge aamma Ilimanaq Lodge
suliffeqarfiup ingerlatarai. Neriniartarfik nunarsuarmi ilisimaneqarluartoq KOKS Mechilin-ip ulloriaanik marlunnik nersornaartisisimasoq Ilimanami inissisimavoq, nunaqarfimmilu takornariaqarneq ataatsimut isingalugu maanna pitsaalluinnartumik ingerlavoq, aviisi Sermitsiaq allappoq.
Ilimanamili takornarissanik sullissineq nunaqarfimmiunut iluaqutaanerusariaqaraluartoq, nunaqarfimmi aqutsisunut ilaasortaq isumaqarpoq. World of Greenland-illi nunaqavissunik
sulisoqarnissani pingaartittuaannaraa, minnerunngitsumillu nunaqavissut takornarissanik sullissisut pitsaasumik suleqatiginissaat pingaartinneqartoq, suliffeqarfiup pisortaanera Asger Køppen oqarpoq. World of Greenlandilu nunaqavissunut unammillertussatut pilersinneqarnikuunngitsoq, akerlianilli maannakkorniit suli annertunerusumik suleqateqarnissamik anguniagaqartuusoq, pisortaanerup erseqqissaatigaa.
Nunaqavissunut tamakkiisumik iluaqutaanngitsoq
Ilimanami takornariaqarnikkut ineriartortitsineq nunaqarfimmut annerusumik iluaqutaanani, innuttaasunut ikittuinnarnut, soorlu illunik attartortitsisartunut, eqqiaasunut ataasiakkaaginnarnut, umiarsuillu takornariartaatit tikikkaanga umiatsiamik angallassisartunut iluaqutaasutut oqaatigineqarsinnaasoq, nunaqarfimmi aqutsisuni ilaasortaq John Rosbach oqarpoq.
Ilimanamimi takornarissanik sullissutit Kalaallit Nunaata avataaneersut nunaqavissunut naleqqiullugit amerlanerujussuupput, taakkulu takornarialerineq annerusumik kisimik iluanaarutigaat, taanna isumaqarpoq.
– Neriniartarfiup KOKS-ip Mechilininik marlunnik nersornaasigaasimasup Ilimanami inissisimanera nunaqarfimmut annerusumik iluaqutaanngilaq, aningaasalli nunami allami takornarialerisunut annerusumik tuttarput, taanna oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: