Ilimagisamit kuulteqarnerusoq
AEX Goldip Canadameersup Nunatsinni kuultimik ujaasinini maannamut iluatsilluarsimavaa. Misiligutigisatta paasinarsisippaa naatsorsuutigisatsinnit kuulteqarnerusoq, aatsitassarsiortitseqatigiiffiup pisortaa Islandimiu oqarpoq.
Canadamiut aatsitassarsiortitseqatigiiffiat AEX Gold nunap immikkoortuani Vagarimi akuersissutaateqarfigisamini iluatsitsilluarpoq.
Aviisi Sermitsiaq taama allappoq.
Misissuinerit kingullerpaat uppernarsarpaat, saffiugassat kinnerit pitsaalluinnartunik kuultitallit tamaaniittut, tamaanilu kuulteqarfinnik allanik nassaarnissaq ilimanaatilerujussuusoq.
– Siusinnerusukkut misissuinivut tunngavigalugit oqaatigisinnaavarput maanna misissuinitta paasinarsisikkaa, tamaani amerlanerusunik kuulteqarfeqarnissaa ilimanaateqarluartoq. Tamatumani nutaartaalluni kuulti taamaallaat ujaqqanut qaqortunut akuunani, qaarsumili aamma nassaassaammat, AEX Goldimi pisortaq Eldur Olafsson aviisimut Sermitsiamut oqarpoq.
Siusinnerusukkut oqaatigineqareersutut kuulti Kujataaniittoq akuitsorujussuuvoq, isumalluutillu nalilerneqarlutik minnerpaamik 263.000 troy ounceussasut (oz). Taakku assigaat kuulti 8,5 tonsit missaanniissasoq, aamma kuulti 1 gram 250 koruunit missaannik akeqarmat, kuulteqarfik AEX Goldimut isertitsissutaalluarsinnaavoq, suliffik taanna suliniummut 100 millionit koruunit missaannik aningaasaliissuteqareersimavoq. Kuulti 8,5 tonsi gramimut 250 koruuneqarpat 2.125 millionit koruuninik isertitsissutaasinnaavoq.
– Akuersissuteqarfigineqartumi Vagarimi periarfissat pitsaasut kingunerinik qillerilluta misissueqqissinnaalerpugut, ilaatigut nunaminertami akuersissutaateqarfigisatsinni, taanna Nanortallip eqqaani kuulteqarfimmi 266 kvadratkilometerinik annertussuseqarpoq. Tamaani kuulteqarfinnik amerlanerusunik nassaarnissaq ilimanaateqarluarpoq, Eldur Olafsson oqarpoq.
Aviisimi Sermitsiami, uani pissarsiarisinnaasarni, atuarnerusinnaavutit: