Ilimagisamiit nannut ikiliartorunanngitsut

Silaannaq kissakkiartoraluartoq Issittumilu ukiuni kingullerni 10–20-ni siku annikilleriarsimangaluartoq, ilimagisamiit nannut ikiliartunnginnerat nannunik ilisimatuut nunanit tamalaaneersut oqarput.

Jyllands-Posteni taama allappoq.

- Ukiuni kingullerni 10–20-ni nannut amerlassusaat eqqarsaatigalugit annertunerusumik allannguuteqarsimanngitsut nanuleritooq Norgep avannaani Tromsøminngaanneersoq, Jon Aars, Norsk Polarinstitutiminngaanneersoq, Jyllands-Postenimut oqarpoq.

Atugaat ajorneruleraluarlutik ikiliartunngitsut

Taassuma Svalbardimi nannunik kisitsineq akisussaaffigivaa, 2004-milu naatsorsuisoqarnerani kisitsisoqarlunilu amerlassutsinik naatsorsuisoqarnerani Svalbardip qanitaani 700-ut missaanniissimapput, Barentshavelu tamaat isigalugu katillugit 3.000 missaaniissimasut inerniliunneqarsimavoq.

2015-mi taamatut kisitsisoqaqqissimavoq/naatsorsuisoqaqqissimavoq, tassanilu Barentshave tamakkerlugu naatsorsorneqarsinnaasimanngilaq. Taamaammat Svalbardimiittut eqqaaniittullu kisimik kisinneqarsimallutik 1.000-llu missaanittut kisitsinermi inerniliunneqarsimalluni.

- Kisitsinitsinni ukiuni aqqanilinni nikigassuteqartup takutippaa nannut ikileriaratik amerleriarsimasinnaasut. Taamaammat nannut atugarisaat ajorseriarsimagaluartut ikileriarnerannik kinguneqarsimanngitsoq inerniussimallutigut, Jon Aarsip kisitsisit nalornissutigigaluarlugit taama nassuiaateqarpoq.