Eqqartuussineq
Ilaqutariit nakuuserlutik toqutsisutut eqqartuunneqartut
Tyskip piaaraluni toqunneranut Danmarkimi ilaqutariit pingasut pinngitsuutinneqarput. Toqussutissaanilli unataasimanerminut pineqaatissinneqarput
Kalaallit erngunneranni peqqarneeqisumik nakuuserluni toqutsinermik kinguneqartumik oqaluttuaq amiilaarnarlunilu alianartoq sapaatit akunnerani kingullerni Koldingip eqqartuussiviani oqaluttuarineqarpoq.
Tallimanngormat suliami pineqaatissiisoqarpoq: Unnerluutigineqartut pingasut – arnaq kalaaleq 52-inik ukioqartoq, ernera 22-nik ukiulik qatanngutaalu angut 40-nik ukiulik – katillugit ukiuni19-ini parnaarussassanngortinneqarput Vejlemi arnap 52-inik ukiullip inissiaani ataatsimik initaqartumi angut tyskeq 50-inik ukiulik Michael Regel siorna apriilimi arfiningnornermi unnulaakkut toqussaa tikillugu unatarlugulu tukertarsimaramikku.
Eqqartuussinerup ulluani kingullermi illersuisut eqqartuusseqataasartunut ilungersorlutik tunngavilersorniarsaraat Michael Regelimut annertuumik nakuuserneq arlaatigut imminut illersorniarsarinerusimasoq, tyskip sullitatik savimmik kapeqinammagit.
22-nik ukiullip illersuisuata aamma erseqqissarpaa sullitami meeraalluni arnani unatartittoq isiginnaartarsimagaa, tamannalu soorunami arnami eqqaani angutinut nakuuserniartunut kamaqqajaassutigilersarlugu. Tassalu illersuiniarluni pissusilersorluni, Michael Regelip arnami inissiaani savilersorneranik uummarissarneqartumik.
Illersuisut tunngavilersuutaannit eqqartuussisut aamma ilaatigut uppertinneqarput, taamaalillutik ilaqutariit pingasut toqutsinermut unnerluunneqarnermut eqqartuunnagit taarsiullugu paragraf sakkukinnerusoq atorlugu tassalu toqumik kinguneqartumik nakuuserneq.
Tamatuma kinguneraa 22-nik ukiulik ukiuni arfineq marlunni parnaarussassanngortinneqarluni, arnaa angaalu marluullutik ukiuni arfinilinni parnaarussassanngortinneqarlutik.
Vejlemi inissiami pisup tunuliaqutaa AG-mi saqqummertumi kingullermi suunngitsutut isikkoqartumik allaaserineqarpoq: Nunat killeqarfiinit immiaaqqat akilernissaat pillugit oqqanneq annertusiartorpoq nakuusernermullu annertusipiloorluni.
Suliaq pillugu AG-mi paasisaqarnerusinnaavutit. Aviisi elektroniskiusoq uani ataani linki atorlugu pisiarisinnaavat: