Ilaqutariit Kujataani annaanneqartut
Ilaqutariit pingasunngornermi unnukkut taarsereersoq angalatillutik sikuminermut taartumut aporamik ajornartorsiulersimapput. Umiatsiamit allamit sumiiffimmiittumit annaanneqarsimapput.
Kalaallit Nunaanni Politiit pingasunngornermi nalunaaqutaq 19.14, Aasiaat Radioatigut umiatsiaq sikuminermut taartumut aporsimasoq pillugu kalerrinneqarsimapput.
Kalaallit Nunaanni Politiit saniatigut umiarsuit sumiiffiup eqqaaniittut tamarmik ajunaalernermi kalerrisaarummik tigusaqarsimapput, qujanartumillu inuinnaap angallataani inuttaq qisuariapallassimavoq, ilaqutariinnullu ajornartorsiortunut ikiuukkiartoqquneqarsimalluni.
Ilaqutariit ajornartorsiulersimasut tassaapput angut, arnaq meerarlu ataaseq Narsamiit Qaqortup Narsallu eqqaaniittumut nunaqarfimmut Qagssimiunukartut.
Unuup ingerlanerani taarsillunilu putsilersimavoq, tamatuma malitsigisaanik isikkivilulersimalluni. Qulliit ikumatinneqaraluartut umiatsiaq sikuminermut taartumut aporsimavoq, ilaqutariillu imaanut nakkarsimallutik.
Ilaqutariit ajunngitsut
Ilaqutariit qujanartumik puttasinnaasunik atallaaqarsimapput, angulli ajutoornermi ajoqusersimavoq. Imminnut ikiorlutik umiatsiamut qaqisimapput, namminneerlutillu ingerlaqqissinnaannginnamik VHF-radio atorlugu ikiortissarsiupallassimallutik.
Umiatsiap inuinnarnik pigineqartup ilaqutariit sumiinnerminnik nalunaarutaat aqqutigalugu nassaarisimavai Qaqortumukaallugillu, tassani ajutoornerminnut atatillugu anertikkarnerminnik ajoqusersimanerminnillu suliarineqarsimallutik.
Ilaqutariit ajutoorsimagaluarlutik ullumikkut ajunngillat.
Atortui iluaqutaasimasut
Ilaqutariit umiatsiaat sumiiffimmut qimaannarneqarsimavoq. Issittumi Sakkutooqarfiup ilaqutariit qanigisaannut umiatsiap sumiinnera ilisimatitsissutigisimavaa, qanigisaasut politiit paasissutissaataat malillugit umiatsiaq ullumikkut aaniarpaat.
Politiit tusagassiorfinnut nalunaaruteqarlutik erseqqissaassutigaat, imaatigut angalanermi ajunngitsunik atortorissaaruteqarnissap qanoq pingaaruteqartiginera, aamma taarsinerani imaatigut angalanermi immikkut mianersornissap qanoq pingaaruteqartiginera.
- Manna pisoq assersuutissaqqissuuvoq, imaatigut angalanermi ajutoortoqartillugu annannissamut eqqortunik atortoqarnissap pingaaruteqarneranut. Ilaqutariit puttasinnaasunik atallaaqarsimanngitsuugunik umiatsiamut qaqeqqissinnaasimanavianngikkaluarput, GPS-imik sumiissusersiuteqarsimanngitsuugunik ikiuiartortut taamak sukkatigisumik anngussimanavianngikkaluarput aamma ajunaalernermi kalerrisaaruteqarsimanngitsuugunik immaqa nassaarineqanngitsuussagaluarput, Kalaallit Nunaanni Politiit pigaartuisa pisortaat politiassistenti Nûno Larsen oqarpoq.