Ilaqutariit Københavnimi tigummigallaanerat kukkunerusimasoq
Københavnimi politiit ataasinngornermi paasissutissiipput, sisamanngornermi kalaallinik ilaqutariinnik timmisartumik Narsarsuarmut angerlariartortunik mittarfimmi tigummigallaaneq kukkunerusoq. Ilaqutariit misigisaminnik Facebookimi siammarteripput pisimasumillu pakatsissutiginnittorujussuullutik.
Nassatanik tunniussinermi kukkusoqarsimanera Lars-Kristian Krusep, aappaata erneratalu Danmarkimit Kujataanut angerlartussannguleramik timmisartumit sisamanngornermi aaneqarneranni pissutaavoq. Taama politiit ataasinngornermi Sermitsiaq.AG-mut paasissutissiipput.
Københavnip politiivinit tallimanngormat suliami taamaallaat paasissutissiissutigineqarpoq, aappariinnik ilaqutariinnillu ikiaroornartumik hashimik anngiortumik eqqusseriaroqarneranik pasitsaassisimaneq tunngavigalugu tigummigallagaqarsimallutik, maannali itisiliissuteqarput:
- Københavns Politi sisamanngornermi juulip 13-iani, akitsuuserinermik aqutsisoqarfimmit Toldstyrelsenimit nalunaarfigineqarput, ikiaroornartumik hashimik nassatani timmisartumik Narsarsualiartussani takussutissaqartoq. Taama pisoqartillugu inuit nassatanik piginnittut timmisartumit niusinneqartarput qanimut misissuiffigineqarnissaat siunertaralugu, politiit Sermitsiaq.AG-mut paasissutissiipput.
Booking normumi ataatsimi nassataminnik tunniussisimasut
Politiit naapertorlugit ajornartorsiut pilersimavoq, nassatanik tunniussinermi kukkusoqarsimammat, taamaalillutillu ilaqutariit marluk nassataat booking normu ataaseq tunniunneqartutut nalunaarneqarsimallutik.
- Taamaattumik ilaqutariit nassatanut ikiaroornartumik hashitalinnut attuumassuteqanngitsut timmisartumit aamma niusinneqarput. Kukkuneq tamanna paasineqarmat timmisartoq ajoraluartumik Narsarsualiarluni aallareersimavoq, taamaattumillu ilaqutariit mittarfimmi politiinit naammagittaalliuuteqarnissamut ilitsersorneqarlutik tamatumalu saniatigut Air Greenlandimut innersuunneqarlutik.
Lars-Kristian Kruse Sermitsiaq.AG-mut oqaluttuarpoq, kukkuneq paasineqarmat nammineq ilaquttanilu politiinit nangaassutitaqanngitsumik utoqqatserfigineqarsimallutik.
