Ilaqutariit katsorsaavissaat piariingajalersoq
Naartusut mikisunillu angajoqqaat katsorsaavissaat Qaqortumi ammangajappoq. Katsorsaavik Apisseq-mik ateqarpoq ilaqutariinullu marlunnut inissaqartitsilluni.
Naartusunut angajoqqaanullu inoorlaaniit marlunnik ukiullit tikillugit qitornallit Apissimi najugaqarsinnaanngussapput. Ilaqutariit toqqissisimasumik angerlarsimaffeqalernissaanut angerlarsimaffik tapersersuisassaaq, siunnersuisassaaq ilitsersuisassallunilu.
Apisserli ammartinnagu perorsaasumik atorfinitsitsisoqaqqaasaaq.
- Katsorsaavimmi perorsaasumik ilaqutariit meeraanut ikiortaasinnaasumik siunnersuisinnaasumillu amigaateqarpugut. Tarnip pissusiinik ilisimasallit allallu katsorsaavimmi pisariaqartinneqartut piareersimapput. Apisseq ammarnissaanut perorsaasumik taamaallaat amigaateqarpugut, Kommune Kujallermi Meeqqanut Inuusuttunut Ilaqutariinullu Immikkoortortaqarfimmi pisortaq oqarpoq.
Najugaqartut peqatigalugit katsorsaanermut pilersaarusiorneq angajoqqaallu qanoq angajoqqaajusinnaaneranut tapersersornissaat perorsaasup ilaatigut akisussaaffigissavai. Atorfimmut qinnuteqartoqanngimmat maanna kommuunip atorfik saqqummiuteqqippaat septembarip aallaqqaataanut killilerlugu.
Katsorsaavik Apisseq Kujallermi ilaqutariinnut sullissivimmut atavoq. Ilaqutariinnut sullissivik assigiinngitsunik tallimanik illoqarfinni assigiinngitsuni illoqarpoq. Taakkunanilu meeqqat inuusuttut ilaqutariillu kommuniimiit ikiorseqarneqartarlutik.
Ilaqutariinnut sullissivik Qaqortumi sumiiffeqarpoq, taassumallu saniatigut ilaqutariinnut sullissivinnik illunik marlunnik, tassa Nanortalimmi Narsamilu aamma sullissiveqarpoq.