Ilaqutariit akissakinnerusut feeriarnissaannut kommuni ikiuisoq
Kommuneqarfik Sermersooq angalanissanut aningaasaateqarfimmut Kalaallit Nunaanni avataanulluunniit angalanissamut piviusunngortitsiffiusinnaasumut qinnuteqaatinik tigooqqaavoq, kingusinnerpaamik marsip 17-ani qinnuteqartoqarsinnaavoq.
Kommuneqarfik Sermersuup innuttaasut isertitakinnerusut angalanissamut aningaasaateqarfimmut qinnuteqarnissaannik kaammattortarpaat – ukioq mannalu aamma taamaaliortoqarpoq.
Kommuneqarfik Sermersuumi innuttaasut tamarmik kommunip nittartagaani qinnuteqarnissamut periarfissaqarput. Qinnuteqarfissaq marsip 17-iani qaangiutissaaq.
Kommunip nalunaarutaa naapertorlugu, Kalaallit Nunaanni imaluunniit avataani angalanissamut kissaatigisat piviusunngortinnissaannut kommunimi innuttaasut aningaasaateqarfikkut periarfissinneqarnissaat. Aningaasaateqarfiup siunertaa tassaavoq innuttaasut ataqatigiinnermik misigisaqartinnerisigut nunanullu tamalaanut paasisimasaqalernikkut avinngarusimanerup ajortumik kinguneqartitsisinnaanerata pitsaaliornissaa.
Angalanissamut aningaasaliiffigineqarnissamut uku eqqarsaatigineqassapput: ilaqutariit akornanni ataqatigiinneq annertunerulersillugu, Kalaallit Nunaanni kulturikkut assigiinngissutsinut paasisimasaqalersillugu, imaluunniit kulturimut allamut paasisimasaqalersillugu.
Pingaartinneqartut
Siorna innuttaasut 77-t angalanissamut aningaasaateqarfimmut qinnuteqarput. Taakkunannga 54-it aningaasaateqarfimmit katillugit 759.000 koruuninik tapiiffigineqartut, kommuni ilisimatitsivoq.
Qinnuteqartut tamavimmik sukumiisumik Angalanissamut Aningaasaateqarfimmi Siulersuisuniit suliarineqartartut, kommuni ilisimatitsivoq. Qinnuteqartuni ilaqutariit meerartallit isertitakinnerusullu pingaanersiuinermi pingaartinneqarput. Ilaqutariit meerartallit akissaatikinnerusullu ukiuni kingullerni tallimani angalaarsimanngitsut salliutinneqarputtaaq.
Kommuneqarfik Sermersuumi innuttaasut UANI qinnuteqarsinnaapput.