Ilaqutariinnut tamanut kommuni pitsaanerpaaq

Ukioq qaangiuttoq Kommuneqarfik Sermersooq aningaasarissaarluni, amerlanerusunik innuttaqalerluni suliffissaleqisullu aatsaat taamak ikitsigitillugit ingerlalluarfiusimagaluartoq, Kommuneqarfik Sermersuumi borgmesterip ilaqutariit ajornartorsiuteqartut suli sullikkusuppai, tassa tamarmik pitsaasumik ineriartortoqarneranit iluaquserneqarniassammata.

Charlotte Ludvigsen (IA) siorna nunami kommunit annersaanni borgmesterinngorami inuunera allanngorpoq, nuannaarutigaali nunarsuarmi kommunit annersaata pitsaanerusumik inuuffigineqarsinnaalersinneqarnissaanut, inuuniarnikkut atugarliortut angerlarsimaffeqanngitsullu ikiorneqarnissaannut aamma siunissamut soqutiginartutut, qiimmaallannartutut annilaanganarsinnaasutullu isigisaminut sunniuteqarsinnanerminik periarfissinneqarami. Tamanna takuneqarsinnavoq ukiup ulluani siullermi ukiortaami siullermeerluni oqalugiaataani.

- Ilaquttakka pingaaruteqarnerpaapput. Nammineq inuuneqarninnut politikkeritullu sulininnut ilaquttakka pingaaruteqarput. Soorlu ilaquttama pitsaasunik atugaqarlutik inuuneqarnissaa anguniarlugu ullut tamaasa iliuuseqartartunga, borgmesteritut qulakkeerniagassaraara Kommuneqarfik Sermersuup ilaqutariinnut tamanut pitsaanerpaamik tunniussaqartarnissaa. Ilaqutariittatta atugarliortut pitsaanerpaamik atugaqalernissaat sulissutigissavarput. Pisariaqartitaminnik ikiorneqassapput, taamaalillutik meeqqat pitsaanerusumik inuuneqalersinniarlugit suliaqarneranni tapersersorlugillu ikiussavavut, borgmesteri oqarpoq.

Taamaaliussaagut ilaqitariit atuartuutillit meeqqerivinniittuutillillu pitsaanerpaamik periarfissinnerisigut, meeqqat ulluinnartik toqqissisimanartutut misigissavaat, ilinniarfigalugit ineriartorfigalugillu aamma pinnguarnissamut nuannaarnissamullu inissaqartinneqassapput.

- Qujanartumik kommunalbestyrelsip tamarmiusup anguniakkannut tunngartillugu isumaqatigivaanga, taamaammat meeqqat atugarliortut ikiorserniarlugit aappaagumut aningaasanik amerlanerusunik immikkoortitsisimavugut. Aappaagu atuarfik nutaaq meeqqeriviillu arlallit Nuummi sanaartorlugit aallartinneqassapput, aamma Tasiilami meeraaqqerivik 40-nut inissalik atuleqammerparput. Kommunalbestyrelsi aamma aalajangersimavoq, inuusuttunut sunngiffimmi neqerooruteqartoqarnerusassasoq. Tamakku tamarmik aappaagumut missingersuusiatsinnut ilanngunneqartut kommunalbestyrelsemi ilaasortanit tamanit akuersaarneqarput, Charlotte Ludvigsen oqarpoq.

Aningaasaqarneq

Kommuneqarfik Sermersuumi aatsaat taamak ikitsigisunik suliffissaaleqisoqarpoq, aamma aningaasaqarnerup ingerlalluartup takutippaa kommunimi ukiuni kingullerni suliffissaqartitsiniarluni suliniuteqarsimaneq eqqortuusoq aamma ineriartorneq innuttaasunut nalinginnaasunut iluaqutaalersimasoq.

- Suliffissaaleqisut ikilinerisa kinguneraattaaq, Kommunalbestyrelsimi politikeriusugut siunissami innuttaasunut pisariaqartitsinerpaanut aningaasanik atuinerulersinnaanerput. Innuttaasut sulinermikkut akileraaruteqarnerisigut meeqqanut inuuniarnermikkut ajornartorsiuteqartunut, atuarfinnut, inissialiornernut aaqqiissuteqarniarlutalu suliniutigisatsinnut allanut pingaarutilinnut aallartissimasatsinnut akissaqarnerulerpugut , borgmesteri Charlotte Ludvigsen oqarpoq.

Suliffissaaleqisut ikittuaraanerisa aamma ajoraluartumik kinguneraat atorfinnik inuttassaaleqineq, tamanna pillugu borgmesterip erseqqissarpaa, eqqaamasassagatsigu suliassaqarfimminni ullut tamarluinnaasa ilungersorlutik sulisut qujamasuutigisarnissaat.

- Utoqqartatsinnik paaqqutarinnittussanik amigaateqarpugut aamma sanaartortuni sulisussaaleqivugut. Nassuerutigisariaqarparput, ajornartorsiut kommunip kisimiilluni aaqqinniarsinnaanngikkaa, pisariaqarporlu meerartavut utoqqartavullu paarsisussaqartissagutsigit aamma sanaartortussaqassappat inuiaqatigiittut aamma akisussaaqataanissaq. Taamaammat tamatta pisariaqartinneqarpugut aamma suliffik sunaluunniit atorfigineqarpat, qujanaq kivitseqataagavit.

Timmisartoqarfik takornariartitsisarnerlu

Nutaamik timmisartoqarfiliorneq ukioq manna aallartinneqassaaq, ukiut pingasut qaangiuppata inuussutissarsiornermut takornariartitsisarnermullu periarfissarpassuaqalersitsisussaq. Charlotte Ludvigsenip sulissutiginiarpaa timmisartoqarfiup Kommuneqarfik Sermersuumi innuttaasunut tamanut periarfissiinissaa, timmisartoqarfilli illoqarfiup takornarissanik ulikkaavittarnissaanut kinguneqassanngitsoq neriuutigalugu.

- Imminut napatissinnaasumik takornariartitsinermik inuusutissarsiuteqassaagut, aalajangersimasumik suliffeqartitsisinnaasumik aamma kulturitsinnik pinngortitatsinnillu ataqqinnittumik.

Oqalugiaammini aamma ilannguppaa, silap pissusaanut avatangiisinullu tunngatillugit FN-ip nunarsuarmi anguniagaanik 17-inik kommunip malinninnissaa, anguniakkat kommuni aalajangiisoqaraangat tamatigut ilanngunneqartassapput.

- Kommunimi aalajangersimavugut nunarsuarmi anguniakkanit 17-iusunit arfineq-pingasut anguniarniarlutigit, tassa aalajangiinerit tamarmik assersuutigalugu silap pissusaanut, peqqissutsimut ilinniagaqassutsimullu sanilliullugit oqimaalutarneqartassapput. Uagut kalaallit pinngortitaq peqatigalugu inuujuarsimavugut, pissusissamisuuginnarporlu sallersaalluta taamatut ingerlatsiinnarnissarput.

Naggasiullugu borgmesteritut ukiortaami anguniakkani, tassalu innuttaasunik peqataatitsinerunissaq saqqummiuppaa.

- Innuttaasut inuuniarnikkut ajornartorsiutitsinnik qanoq qaangiiniarsinnaanerluta aamma illoqarfitta qanoq ineriartortinneqarsinnaaneri pillugit isumaat tusaruppara. Qularutiginngilara Kalaallit Nunaanni inuit tamarmik unammilligassatsinnut aaqqiissutissaqartartut, taakku tusarusuppakka.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS