Ilanngaassivik

Ilanngaassivik Siumukkormiunit aamma akerlerineqarpoq

Naalakkersuisut akiliisitsiniartarnermut aaqqiissutissatut siunnersuutaat, Avannaata Kommuniani ikaarsaariarnermut ataatsimiititaliami Siumut sinnerlugu ilaasortap akerlilerpaa.

Akiliisitsiniartarnermut aaqqiissutissaq nutaaq, Ilanngaassivik, unitsinneqartariaqartoq, Sakio Fleischer (S) isumaqarpoq.

- ”Ilanngaassivik” inatsisinik tunngavissaqanngitsoq unitsinniarli.

Naalakkersuisunut allakkamik ammasumik Sakio Fleischer (S) Avannaata Kommuniani ikaarsaariarnermut ataatsimiititaliami ilaasortaasoq taama quleqitsiilluni allappoq.

Naalakkersuisut akiliisitsiniartarnermut aaqqiissutissatut siunnersuutigisimasaannut – akissarsiassat tunniunneqannginnerini ilanngaaseriffik, Sakio Fleischerip akerlilerpaa. Tassanilu 935 millionit koruunit akiitsut ikilisarneqarnissaat anguniangaavoq.

Aamma atuaruk: Randi V. Evaldsen: Ilanngaassivik tamanut atuutissanngilaq

Akiliisitsiniarnermut aaqqiissut kommuninit suliarineqassaaq.

Taanna isumaqarpoq akiitsut appariartortinneqarnissaannut aqutissaq pitsaanerpaaq tassaasoq akiliisitsiniartarnerup kommuninut utertinneqarnissaa.

Akiliisitsiniartarnerup Namminersorlutik Oqartussat qitiusumut nuunneqarnerisa kingorna akiitsut qummuinnaq aallarnikuupput. Kukkussut avataani pisunut ilaarsiniarnerup nassataraa, Nunarsuarput isorartooq imaaliallaannaq sumiiffimmiit sumiiffimmut orniguteriaannaatinnagu qitiusumik ingerlateriaaseq atorneqarsinnaanngitsoq inuppassuugut nalunngilarput, Sakio Fleischer isumaqarpoq.

Sakio Fleischerip oqaluttuaraa nammineerluni ukiuni arlalinni kommunimi akiliisitsiniartartuunikuulluni. Inuit akiligassaqartarnikut amerlaqaat suleqatigiumanartartut, sunalu pineqartoq paasingaangamikku suleqatigiumanneq annertooq pilersarpoq kinguneqarluartartoq.

Inatsisut tunngavilersuutit takusinnaanngikkai.

Akiitsunik akiliisitsiniartarneq Eqqartuussisarnermut inatsit (retsplejeloven) aammalu Indrivelseslov malillugit taamaallaat ingerlanneqarsinnaapput. Ilanngaassivik inatsisit suut atuuttut malillugit pilersinneqarniarnersoq takuneqarsinnaanngilaq.

- Ilanngaassivik isumatusaarnerunngilaq, aamma kiinaqanngilaq qulaaniillu aqutsiniarsarinerulluni, Sakio Fleischer oqarpoq.

Taassuma tikkuarpaa Ilanngaassivimmik siunnersuuteqartut qinnuigai inuit akisussaaffiinik arsaartuinissamik isumalimmik pinnatik kommunini akiliisitsiniartartunik pilersitseqqinnissaq ujartorneqassasoq.

- Taamaliornikkut inuit qanimut suleqatigineqarnerat ingerlaqqissinnaammat, taassumalu nassatarissaavaa akiitsup qaffakkiartuinnalersut appartikkiartorneqarnissaanut periarfissaq, Sakio Fleischer isumaqarpoq.

Aamma atuaruk: Naalakkersuisut akiliinerluttartunut sukaterilerput

Powered by Labrador CMS