Ilanngaaserisut aningaasarpassuarnik arsaarinnittut

Ilanngaaserisut ukioq kingulleq ulapaarsimasut Vittus Qujaukitsup paragraf 37 naapertorlugu akissuteqaataani atuarneqarsinnaavoq.

Tassami 39 kg-mik hashimik suliassanut 97-inut agguataakkanut arsaarinninnerit, 2018-imut naleqqiullugu 1,3 kg-p missaanniittunik annertunerusumik arsaarinnittoqarsimalluni.

Aningaasat arsaarinnissutigineqartut pingasoriaammik amerleriarsimasut aamma akissuteqaaammi takuneqarsinnaavoq:

- Taakku saniatigut 6,6 million koruunit aningaasat tigussaasut arsaarinnissutaasimapput, taakku suliareqqitassatut politiinut ingerlateqqinneqarsimapput. 2018-imi aningaasat tigussaasut arsaarinnissutit 2,2 million koruuniusimapput, Vittus Qujaukitsoq allappoq.

Ilanngaaserisut amerlanerusut

Akileraartarnermut Aqutsisoqarfik ilanngaaserisunik marlunnik nutaanik Ilulissani atorfinitsitsisimavoq, 1. Maj 2018-imi aamma 1. September 2018-imi.

Kangerlussuarmi pissutsinut tunngatillugu taaneqarsinnaavoq, piffissami kingullertigut Akikeraartarnermut Aqutsisoqarfik ilanngaaserisunik qimmilinnik atorfinitsitsisimammat. Maannakkumut Kangerlussuarmi ataatsimik ilanngaaserisumik atorfinitsitaqarpoq, aamma Akileraartarnermut Aqutsisoqarfik ilanngaaserisumik suli ataatsimik atorfinitsitassarsiorpoq, ilisimatitsissutigineqarpoq.