Ilanngaaserisuni tigusaasoq: Angut ukioqqortunerusoq hashimik Nuummut eqqusseriaraluartoq
Angut ukioqqortunerulaartoq hashimik eqqusseriarsimasoq politiit maanna tigummivaat. Hash qanoq oqimaatsigisoq eqqunneqaraluarsimanersoq politiit maanna misissorpaat. Angut unnerluutigineqassaaq killisiorneqarlunilu.
Angut Nuummi timmisartoqarfimmi ilanngaaserisunit tiguneqarpoq, hashimik pladenik marlunnik angalanermi tigummiaamini nassataqarnera pissutigalugu. Angut maanna Nuummi politeqarfimmiippoq.
KNR taama allappoq.
Kalaallit Nunaata Politiivini pigaartut pisortaat Sermitsiaq.AG-mut ilisimatitsivoq angut ukioqqortunerusoq.
- Paasissutissat sukumiinerusut saqqummiussinnaanngikkallarpakka, suliaq suli paasiniaaffigigatsigu, Jørgen Madsen oqarpoq.
Unnerluutigineqassaaq killisiorneqarlunilu
Pigaartut pisortaat oqaluttuarpoq angut nassataamini hashimik qanoq oqimaatsingisumik nassarsimanersoq politiit maanna misissoraat.
Hashimik eqqusseriarneq politiinut nalunaarutigineqarpoq nal. 13.32.
Pigaartut pisortaat nal. 15.30 ilisimatitsivoq angut suli tigummigallarneqartoq.
- Unnerluutigineqassaaq killisiorneqarlunilu. Tamassuma paasiniaanerullu kingorna paasinarsissaaq suliaq qanoq ingerlariaqqissanersoq, oqarpoq.