oqaluffiit
Ilagiit oqartussaqarnerulersillugit
Nick Nielsenip siunnersuutigaa nunami tamarmi ilagiit oqaluffiit ineriartortinneqarnerani sunniuteqarnerulissasut
– Oqaluffiit aqunneqarnerat annertunerusumik ilagiinnut tunniunneqassaaq, ilagiit sulilersillugit, akulerutsillugit sunniuteqaqataatillugillu oqaluffitsinni qanoq pisoqarneranik.
Oqaluffimmi innuttaasut oqaluffigaat. Taamatut inassuteqarpoq Nick Nielsen, Siumut sinnerlugu Inatsisartunut qinigassanngortittoq.
Taanna Naalakkersuisuni tunuaqqammersuni ilageeqarnermut Naalakkersuisuusimavoq.
– Oqaluffiup ineriartortinnerani ilagiit peqataatikkusuppakka, sulilu nalunaajaatillugit tullimik asanninnermik, Nick Nielsen qineqqusaarummini allappoq nangillunilu:
– Taamaattumik sumiiffimmi peqataanissaq naleqartittorujussuuvara. Ulluinnarni qanittutsinnilu kinaassuserput pilersinneqartarpoq inuunermillu nuannarinninneq nassaarisarparput. Sumiiffinni peqatigiiffinni aammalu ilagiinni ingerlatat atugassarissaartinneqassapput taamalu annertunerusumik sunniuteqalerlutik, taanna isumaqarpoq.
Nick Nielsen aamma isumaqarpoq tamanna pingaaruteqarpoq anguteqatiminnoortartut/arnaqatiminnoortartut katissinnaanissaannik qitornarsiavittaarsinnaanissaannillu maanna oqallinnermut.
Tamatumunnga atatillugu Nick Nielsen oqarpoq: – Ilagiinnut naalakkersuisusimasutut qulakkeersimavara anguteqatiminnoortartut arnaqatiminnoortartullu oqaluffimmi katissinnaanerat. Inatsit qallunaat oqartussaaffigaat. Taamaattumik pisariaqarsimavoq qallunaat naalakkersuisuinik suleqateqarluarneq. Tamatumani immikkut ittutut ittumik inatsisiliortoqarsimavoq. Inatsisartut tullianik ataatsimiinneranni aalajangersagaq atortuulersinneqarsinnaavoq, Nick Nielsen oqarpoq.