Ilaasut ullormut 30.000-t SAS-imi timmisartortartut suliumajunnaarnerannit eqqugaasassapput
Timmisartortartut suliumajunnarneranni SAS-ip angalanissaasa affaasa missaanniittut taamaatiinnarneqartassapput. Ullormut ilaasut 30.000-t eqqugaasassapput.
SAS-imi timmisartortartut akornanni suliumajunnaartoqarnera piffissami naleqqutinnginnerpaami pivoq – tassa aasaanerani sulinngiffeqarnerup nalaani.
Suliumajunnaartoqarnerani angalasut 30.000-t missaanniittut ullormut eqqorneqarnerannik tamanna kinguneqarpoq, SAS taama ilisimatitsivoq, suliumajunnaartoqarnerani taakku ullormut angalanissaraluit affaasa missaat taamaatittariaqarpaat.
- Atuisutta suliumajunnaarnermit eqqugaanerat ajuusaarutigisorujussuuarput, tamanna kinguaattoornernik taamaatitsinernillu kinguneqarpoq, SAS-imi qullersaq Anko van der Werf tusagassiuutinut nalunaarummi taama oqarpoq.
- Ilaasutta tamarmik aasaanerani feeriarnissartik qilanaarisimagaat nalunngilarput, nammineerlutillu asasatik peqatigalugit angalanissamut billetisisimasut. SAS-imi sulisut pisumit alianartumit eqqorneqartunik ikiuiniarlutik ilungersorlutik sulipput.
Apollomit sullitat eqqorneqartut
Ilaasut timmisartumut billetinik nammineq pisisimasut aamma ilaasut angalatitsivik aqqutigalugu SAS-imut attartorlutik billetisisimasut suliumajunnaarnermit eqqugaapput.
Apollomi SAS-imut attartortut annerit ilaanni, angalasunut piffissanik allanik nassaarniarluni suliniuteqartoqarpoq.
- Timmisartuussinernut eqqorneqartunut timmisartunik taartaasinnaasunik nassaarniarluta ulapputeqarpugut. Angalanissat suliumajunnaarnermit eqqorneqarsimappat, SMS-ikkut attaveqarfigissavatsigit, Apollo nittartakkamini taama allaaserisaqarpoq.