Ilaasut mittarfimmi unnuisut
Kangerlussuarmi mittarfik sapaatip-akunnerani kingullermi ingerlariaqqiffiusinnaajunnaarmat, Air Greenlandimi ilungersunartorsiortoqarpoq, tassa timmisartorsuaq Airbus aamma sinerissamut timmisartuussinerit tamarmik silap ajornera pissutigalugu ingerlariaqqissinnaajunnaarmata. Ilaasussat utaqqisut 500-t Mittarfeqarfimmiipput amerlaqisullu Air Greenlandimit unnuiffissarsissunneqarsinnaasimanngillat
Air Greenlandip ukioq nutaaq ilungersunartorsiorluni aallartippaa. Teknikikkut ajornartorsiutit silalu pissutaallutik Nuummi, Kangerlussuarmi aamma Københavnimi ilaasorpassuit ingerlariaqqissinnaajunaartut ilungersuatitsipput, Sermitsiaq allappoq.
Siullermik Airbusip akornuteqalernerata kinguneranik ilaasussat hunnorujunik arlalinnik amerlassusillit nuunneqartariaqarput. Tamatuma kingorna silap ajornera pissutigalugu sinerissamut angallassinissaraluit tamangajammik mittarfiit quasappallaarneri silallu ajornera pissutigalugit taamaatiinnarneqarput. Taamaalilluni ilaasussat 500-t missaat marlunngornermit januaarip qulingiluaannit pingasunngornermut januaarip qulingannut Kangerlussuarmi saperngupput.
Unnuiffissamik neqeroorfigineqarnissaq
Ilaasussat ilaat siniffissaqaratik paasitinneqarput, tamatumunngalu taarsiullugu mittarfimmi tippimik tunineqaannarlutik, taamaalillutik ullaanngorpat timmisartup tulliata aallarnissaata tungaanut issiavinni sinissinnaaniassammata. EU-mili peqqussut nr. 261, 2004-meersoq naapertorlugu angalasut nunamit EU-mut ilaasortameersut, nunamut EU-mut ilaasortaanngitsumut angalasut, soorlu ilaasut Kalaallit Nunaaliartut unnuiffissaminnik neqeroorfigineqartussaapput. Ilaasut arlallit unnuiffissarsissunneqarsinnaannginnerat, Air Greenlandimit ajuusaarutigineqarpoq.
– Unnuiffissamik neqerooruteqarsinnaannginnerput soorunami naammaginanngilaq. EU-mi peqqussut naapertorlugu periarfissaqartillugu inissarsissuttarpavut. Taamaattorli Nunatsinni illoqarfinni arlalinni akunnittarfinni inissat killeqartarmata tamanna naammassisinnaajuaannanngilarput. Taamaattumik ilaasut periarfissaqartillugu namminneerlutik inissarsioqqullugit kajumissaarneqartariaqartarput. Taama inissittoqartillugu inissiffigisamut angallanneqarnermullu aningaasartuutit tamaasa Air Greenlandip utertittarpai, tassa naleqquttumik akiliisoqarsimappat aamma ilaasup aningaasartuutiminut uppernarsaatit takutissinnaagaangagit.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: