Skip to main content

Ilaasut 72-t kinguaattooqqasut: Siumut Air Greenlandimut isornartorsiuivoq

Qeqertarsuup Tunuani qulimiguulimmik angallassisarneq pillugu Air Greenlandip pisortaanerata oqaasiinut Jess Svane isornartorsiuivoq

Air Greenland isornartorsiorneqaqqippoq. 

Sermitsiaq.AG-mit allaaserineqartoq Inatsisartuni ilaasortap Jess Svanep Air Greenland isornartorsiorpaa. 

Air Greenlandimi pisortaaneq Michael Højgaard allaaserineqartumi uani Qeqertarsuup Tunuanit angalaniartut 72-it suli unittooqqapput - isornartorsiuinerit Air Greenlandimit eqqunnginnerarneqarput ima oqarpoq:

- Sila pissutaalluni Qeqertarsuup Tunuani sumiiffinni assigiinngitsuni angalaniartut 72-t unittooqqagallarput. Teknikkikkut atortorissaarutit pissutaallutik kinguaattoortoqanngilaq. Atortorissaarusimmi pigaagut. Timmisartortartoqarpoq, kisianni tassa sila pissutaavoq angallassisoqannginneranut. Tallimanngornermi akunnerulluunniit naanerani angallassisoqarsinnaassappat angallassisoqassaaq.

Jess Svanep oqaatigineqartut paasisinnaanngilai. 

'Mitallertumik oqariartortoq'
Air Greenlandip pisortaanerata oqaasii 'Qeqertarsuup tunuani qulimiguulimmik angalaniarluni ilaasunut mitalleerpalaartumik oqariartortoq' Jess Svane oqarpoq.

- Qeqertarsuup tunuani ukiuunerani angalaniartarnerup ilungersunarluinnarnera kingumut ulluni kingullerni uppernarsineqaqqippoq. Paasinarluinnarporlu isumannaallisaaneq pissutaalluni silap naalangarsiortitsinera kinguaat-toornernut pissutaagaangat, Jess Svane Semitsiaq.AG-mut oqarpoq. 

Ilaasunut paasissutissiisarnerit amigartuusut Michael Højgaardip nassuerutigaa, aamma qulimiguullit Bell 212-it nutarsarneqarnissaat kissaatigalugu oqarluni.

Michael Højgaardip ima oqarnera Jess Svanep aamma isornartorsiorpaa: 'Qeqertarsuup Tunuani timmisartuussinerit akisupput, taamaammat ilaasussat angalanissaminnut akigitinneqartoq tamaat akilerneq ajorpaat, tassami Namminersorlutik Oqartussat tapeeqataasarpoq. Qulimiguulinnik nutaanik pisiniaraanni aamma aningaasartuutigineqartussat eqqumaffigineqartussaapput'.

Isornartorsiorneqaqqittoq
- Paaserusunnarporlu taama oqaaseqarnermini suna oqaatiginiarneraa? Tassami tassunga tunngatillugu oqariartuutaa ersarluppoq, allaanginnami oqarniartoq Namminersorlutik Oqartussanit kiffartuussinissamik isumaqatigiissummit aningaasaliissutit ilaasullu akiliutigisartagaat naammaginagu oqariartortoq? Jess Svane apeqqusiivoq. 

- Pisortap ilisimassagaa qularutiginngilara uanga Qasigiannguaniik Ilulissanukassanguma minutsit 20-vit ataallungit timmiffiusumut 1.500 koruunit sinnilaarlungit akiliisussaasunga. Aammalu sapaatip akunnerata ulluini allami allatut ajornartumik Ilulissanukassaguma Aasiaat imaluunniit Qeqertarsuaq aqqusaaqqaarlungu akiliisariaqarpunga 3.000 koruunit sinnerlungit. Akit taakkorpiaat aamma Qeqertarsuarmiik angalassagaanni atuupput. Kiffartuussinissamik isumaqatigiissuteqarfiusuni allani akit amerlanerpaatigut affaannaapput ilaatigullu affaat inorlugit akeqarlutik, Jess Svane nassuiaavoq. Qeqertarsuup Tunuani angalaniarneq misissuiffigineqarnissaa aamma neriuutigaa.

Air Greenlandip aningaasaqarnera pillugu Sermitsiamit allaaserineqartut aviisimi atuakkit. Aviisi ataani pisiarineqarsinnaavoq:

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER