Ikummatissat akisunerulerneri miliuunilikkaanik akiligassaqalersitsisut
Aningaasaqarnermut Akileraartarnermullu Ataatsimiititaliamit Pinngortitaleriffimmut immikkut 3,1 millioner koruuninik aningaasaliissuteqarnissaq akuerineqarsimavoq. Aningaasaliissuteqartoqarpoq ilisimatusarnermi angallammut nutaamut Tarajormut ikummatissat akisunerulersimammata.
Nukissiuuteqarnermut akigititat aamma umiarsuarnut ikummatissat akii ukioq manna qaffangaatsiarsimapput, tamannalu Pinngortitaleriffimmit malugineqarsinnaasimalluni.
Pinngortitaleriffik immikkut 3,1 millioner koruuninik aningaasaliiffigineqarsimavoq, aningaasallu ilisimatusarnermi angallammut Tarajormut ikummatissat akisunerulersimaneranni immikkut aningaasartuutaasunut matussutigineqassallutik.
Umiarsuaq nutaajuvoq, ukiorlu manna siullermeerluni apriilip qaammataani Nuummut tikilluni. Umiarsuaq ilisimatusarnermut aamma raajat aalisakkallu nakkutigineqarnerannut aamma imaatigut silap pissusaata allanngoriartornerata nakkutigineqarneranut atorneqartussaavoq.
Pinngortitaleriffimmi pisortaanerup Klaus Nygaardip Sermitsiaq.AG-mut oqaatigaa, immikkut aningaasaliiffigineqarnermut ikummatissat akiisa pingasoriaammik qaffassimanerat pissutaasoq:
Misissuinissanut pisariaqartinneqartoq
- Umiarsuaq angisuujuvoq, taamaammat kiffartuussinissamik isumaqatigiissut aqqutigalugu umiarsuaq orsersorsinnaanngilarput, akisuallaanngitsunilli pisiaqartariaqartarpugut. Liiterimullu akia tre koruunit missaanniit 9 koruuninut qaffassimalluni, Klaus Nygaard oqarpoq.
Taassuma ilanngullugu oqaatigaa, Pinngortitaleriffiup ukioq manna raajanik aalisakkanillu misissuinissaanut ikummatissat akisunerusut atornissaat pisariaqavissimasoq, misissuinissammi 2021-mi Tarajoq kinguaattoorutigineqarsimammat ingerlanneqarsinnaasimanngimmata.
- Immikkut aningaasanik pisariaqartitsilersimanerput nuannerpallaanngilaq. Aningaasat naleerukkiartorneri pissutigalugit allanik aamma unammillernartitaqarsimavugut, taakkuli missingersuusiatta iluini isumagisinnaasimavagut, ikummatissanulli atatillugu tamanna pisinnaasimanngilaq.
Umiarsuaq naammagisimaarneqartoq
- Imaatigut angalanissat unitsiinnarsinnaasimagaluarpavut, tamannalu kingunerluuteqangaatsiarsimassangaluarluni. Assersuutigalugu qaleralittassiissutissat appartinneqarsimapput, kisitsisitigut paasissutissanik amigaateqarnerput pissutigalugu, tamannalumi ikummatissanut immikkut aningaasaliiffigineqarnermiit suli akisunerungaatsiarluni.
Klaus Nygaardip erseqqissaassutigaa, Pinngortitaleriffimmit umiarsuaq naammagisimaarneqartoq, angalaffissatullu pilersaarutaasimasut tamarmik naammassineqarsimasut.