Ikuallattoqarneratigut Nuup illoqarfiata annersaa qamippoq

Pingasunngornerup unnuaani Nuummi sakkortusaavik ikuallalersimavoq. Ikuallammat illoqarfiup 80 procentia sarfaaruuppoq. Pingasunngornerulli ullaavani illoqarfiup annersaa sarfaqaqqilerpoq, sulili qamittoortoqaqqissinnaavoq.

Nuumi sakkortusaavik pingasunngornerup unnuaani ikuallalermat Nuup illoqarfiata annersaa sarfaaruppoq.

Politiit pingasunngornerup unnuaani nal. 01.32 Nuummi innaallagissiorfik Sarfannguaniittoq ikuallattoq pillugu nalunaarfigineqarsimapput.

Politiit takkukkamik ikuallattoqarneranik takusaqarsinnaasimanngillat, kingunitsiannguatigulli takusinnaalersimavaat sakkortusaavik ikuallattoq.

- Tamatuma malitsigisaanik illoqarfiup 80 procentia sarfaaruppoq, pigaartut pisortaat Bruno Brix Sermitsiaq.AG-mut oqaluttuarpoq.

Suli qameqqittoqarsinnaasoq

Nukissiorfinnit unnuaq naatsorsuutigineqarsimavoq, nalunaaquttap akunnerisa marluk ingerlaneranni sarfaqaqqilissasoq, pigaartut pisortaat oqaluttuarpoq.

Nal. 04.25-p missaani Nukissiorfinnit nalunaarutigineqarpoq, illoqarfiup 75 procentia sarfaqaqqilertoq, nalunaaqutarlu tallimanut nalunaarutigineqarluni illoqarfiup annersaa sarfaqaqqilersimasoq.

Pingasunngornerup ullaavani illoqarfiup annersaa sarfaqaqqilertussaasoq oqaatigineqarsimavoq, sulili qameqqittoqarsinnaasoq oqartussanit oqaatigineqarluni. Sermitsiaq.AG-p paasissutissaatai naapertorlugit, pingasunngornerup ullaavani illoqarfimmi sumiiffiit arlallit suli sarfaqalersimanngillat.

Kalaallit Nunaanni Politiit pisoq Facebookikkut nalunaarutigaat. Nukissiorfiilli suli tamanna pillugu allagaqarsimanatik.

Innuttaasut ernumasut

Innuttaasorpassuit pingasunngornerup unnuaani ernumassuteqarnertik Facebookikkut saqqummiussimavaat.

Nuummi angerlarsimaffippassuit innaallagissamik kiassagaapput.

Siorna ukiakkut annertuumik sarfaaruttoqarnera Nuummi innuttaasut misigisimavaat, taamanikkut Nukissiorfiit ulluni arlaqartuni innaallagissamik pilersueqqilernissaq sulissutigisimavaat. Taamanikkut Utoqqarmiut Kangerluarsunnguani erngup nukinganik nukissiorfiup illoqarfimmut sarfalersuisup kabeliata ajoquteqarnera pissutaasimavoq.

Powered by Labrador CMS