Ikuallattoqarnerani nunakku pisuttut Illersornissaqarfiup annaakkai

Kangerlussuup ungasinngisaani nunakkut pisuttut, nunap ikuallannerani marlunngornermi unnukkut pujorsuarmiileramik aniguisinneqarput.

Politiinut ajornartoornermi nalunaaruteqarput, kisianni Air Greenlandip qulimiguuliutaata pisuttut marluk takornariartitsisuallu nassaarisinnaanngimmatigit, danskit illersornissaqarfiat iliuuseqarpoq.

Illersornissaqarfiup qulimiguuliutaasa nutaat Seahawk umiarsuarmi Absalonimit aallartinneqarpoq, sensorillu nutaaliaasut atorlugit piffissap sivikitsup ingerlanerani ikiortariaqartut pingasut nassaarineqarput.

Qulimiguullip pisuttut Sisimiuni nakorsamit passutsikkiartorpai, Issittumilu Sakkutooqarfiup nalunaarutaa malillugu timimikkut ajoqusinngillat.

Kangerlussuup Sisimiullu akornanni ikuallattoq juulip arfineq-pingajuannili aallartippoq, politiit oqarnerat naapertorlugu pujoorivimmit aallartinneqarpoq.

Qatserisartut aamma kajumissutsimik sulisut arlaleriarlutik inneq qamippaat, kisianni ikuallattoq nunami issoqarluartumi ikummaqqitgtarpoq, anorillu sakkortuut akuttunngitsumik ikummarteqqittarlugu.

Takornariat marluk takornariartitsisuallu Illersornissaqarfiup nalunaarutaa malillugu nunap ikuallaleqqissimanera ilisimanagu Kangerlussuarmit aallarsimapput.

Danmarkimit Kalaallit Nunaannut qatserisartut qamisaajartorlutik tapersiiaartorlutik tikinnerannit akunnerit arlaqanngitsut qaangiuttoq pisoq pivoq.

Marlunngornermi unnukkut unnuap qeqqanngilaartoq qallunaat qatserisartut atortuilu sumiiffimmut pipput, ikuallattoq aqunniarnissaanut ikiuukkiartorlutik. Erngertumik sulillutik aallartipput.

Danskit qatserisartut kajumissutsimik sulisut, sakkutuut aamma Upalungaarsimanermut Aqutsisoqarfimmi qatserisartunik misilittagartuunik ilaqarput.

Tamanna ilaatigut kapputtakkanik takisuunik nunamut kappussuilluni imerterinikkut tamanna pissaaq, taamaalilluni issumi ikumasut qaminneqarsinnaassammata.