Ikuallattoqarnerani kajumissutsiminnik ikiuuttoqartoq
Ilulissani qatserisartut ikuallattumik qamisaanerminni kajumissutsiminnik sulisunik maanna ikiorteqalersimapput.
Ilulissani eqqaavissuarmi pingasunngormat ikuallattoqalerpoq, ullumikkullu ullut arfinilissaat suli pujuliorfiulluni.
Qatserisartut qamiterissallutik sulingaatsiarsimapput. Ersiinnartumillu ikumasoqarunnaareeraluartoq, taamaattoq sumiiffimmit qaqortumik suli pujuliortoqarpoq.
- Qatserisartut kajumissutsimik suliaqartunit ikiorneqalerput. Sumiiffimmi maanna nillusaapput, pujuliorneq uninniassammat, Avannaata Kommuniani upalungaarsimanermut pisortaq, Jens Dahl Sermitsiaq.AG-mut oqarpoq.
Taanna nassuiaavoq kajumissutsiminnik suliaqartut ikuallattumut qanillitinnagit ikiuutsinneqartut.
- Imermik serpalittaatit slangit aaqqillugillu siaartarpaat. Atortullu nussornerini ikiuuttarlutik. Isumannaatsumiit ikiuupput, qatserisartullu eqqaavissuarmi qatserillutik, Jens Dahl oqaluttuarpoq.
Qanillinagu
Kalaallit Nunaata Politiivi Ilulissani innuttaasut ulluni kingullerni ilisimatippaat ikuallattoq timmisartoqarfiullu tungaanut aqqusineq qanillissanngikkaat. Politiit sapaammi ilisimatitsipput suli ikuallattoqartoq.
Sumiiffimmi pujuliortoqarnera pissutigalugu innuttaasut illup iluani isersimaqquneqarsimapput, igalaallu matooqquneqarlutik. Innuttaasut peqqiilliortutut misigisut napparsimavimmut saaffiginneqquneqarsimapput.
- Ikumasinnaasut tamarmik ikuallareerput. Iluanili saviminikorsuit kissarneranni aakkiartortoqarpoq. Taakku maanna nillusarneqarput, Jens Dahl oqarpoq.