Ilulissat
Ikuallannerup kingorna: Raajanik tunisassiorneq aallarteqqippoq
Ilulissani Royal Greenlandip suliffissuata ikuallanneratigut tunisassiorfik eqqorneqanngilaq, raajanillu tunisassiorneq ullumi aallarteqqinneqarpoq
Royal Greenlandip Ilulissani suliffissuani ikuallattoqarnerata kingorna raajanik tunisassiorneq ullumi aallarteqqissinnaalereerpoq, kinguaattoortumilli, Royal Greenland tusagassiorfinnut nalunaarutikkut paasissutissiivoq.
– Ilulissani raajanik suliffissuup ikuallannerani qujanartumik sulisut tunisassiorfillu eqqorneqanngillat. Innaallagissamut atortut tamarmik ajunngillat, raajanillu tunisassiorneq ullo´qeqqata missaani aallartissinnaasimavoq, Royal Greenland naapertorlugu suliffissuup pisortaa Jensigne Schmidt oqarpoq.
Isua ikummartippaa
Ikuallanneq, suliffissuup avannamut isuanit 6 meterit missaannik ungasissusilimmit, pallinik errorsiviisarsuarnillu plastikkinik inissiisarfimmi aallartissimasoq, ima sakkortutigisimavoq suliffissuup isua ikummartissimallugu.
Ikuallannermi opgangi, elevatori ataaseq trappeopgangilu eqqorneqarput. Ikuallanneq aallartimmat eqqiaasut ikittut sulisimapput.
Suliffissuup pisortaata suliffissuarmilu qullersat, unnuaq sininngitsuuissimasut, ikuallanneq qanoq annertutiginersoq suliffissuarmullu akornutigisinnaasai, ullaassamiilli misissulersimavaat.
Tunisassiorfimmit meterit tallimat
– Suliffissuup avannaa´tungaani ikiuallanneq tunisassiorfimmit meterit tallimat missaannik qanitsigaaq, qujanartumilli siaruaassimanngilaq. Ikuallannermi aamma poortuutissat ajoqusersimanngillat, taamaattumillu qaleralinnik raajanillu tunisineq akunnialunnik kinguaattoorluta aallartipparput, suliffissuup pisortaa Royal Greenlandip attaveqarnermut immikkoortoqarfianut nassuiaavoq.
Kutteri raajarniut Bingo 3 Ilulissani suliffissuarmut raajartaminik tunisaqarsimavoq. Kutteri raajarniut alla, suli kilisattoq aammalu suliffissuarmut tunisisussaasimagaluaq, suliffissuup pisortaata nalunaaqutaq 23.00 missaani sianerfigisimavaa qinnuigalugu Sisimiuni raajanik suliffissuarmut tunisiartoqqullugu.
Politikommissæriugallartoq Carl Sværd paasissutissiivoq Ilulissani politiit aalajangersimasut Danmarkimi Nationalt Kriminalteknisk Centerimut paasiniaasartunik qaaqqusiniarlutik, ikuallannerup aallartiffianik misissueqqissaartussanik.