Ikuallanneq sinittarfimmi aallartissimasoq
Kalaallit Nunaanni Politiit Paamiuni septembarip aallaqqaataani ikuallattumik misissuisimanerisa takutippaat, inissiami inip allermiittup sinittarfiani ikuallanneq aallartissimasoq.
Paamiuni ikuallattoqanera inuit pingasut inuunerannik naleqartoq, sapaatip akunnerani kingullermi ataasinngornerup marlunngornerullu akornanni unnuakkut inissiami inip allermiittup sinittarfiani aallartissimavoq.
Tamanna Kalaallit Nunaanni Politiit ilisimatitsissutigaat.
Ikuallattoqarsimaneranik misissuisisartut toqusunillu misissuisartut Danmarkimeersut kiisalu politiit Nuummeersut Paamiuni politiit ikuallattoqarneranik misissuinerannut ikiuupput,
Ikuallanerup qanoq pilersimaneranut pissutaasoq suli erseqqissumik paasineqanngilaq.
- Ikuallannermut pissutaasoq sunaanersoq paasiniarlugu teknikkikkut misissuinerit ingerlanneqarput. Inaarutaasumik inerniliisoqartinnagu nalunaarusiassaq utaqqimaarparput, vicepolitiinspektøri Viggo Johansen Sermitsiaq.AG-mut oqarpoq.
Kalaallit Nunaanni Politiit ilisimatitsissutigaat, toqusimasut misissorneqarnerisa takutikkaat, inuit pingasut ajunaartut tamarmik putsumik iioraasimanertik pissutigalugu toqusumasut.
Kalaallit Nunaanni Politiit ilanngullugu ilisimatitsissutigaat pinerluuteqartoqarsimaneranik takussutissaqanngitsoq, alianaqisumilli ajunaartoqarsimasoq.