»Ikivut imaaliorluta mamisissavavut«
Ukiut 70-it matuma siorna pisimavoq, ilumoortulli saqqummiunneqassapput, politikerit oqarput. Nunasiaataasimanerup nalaa pillugu qulaajaanerup kiffaanngissuseqalersissavaatigut, partiip oqaaseqartua isumaqarpoq. Suliarli sivisullunilu akisusinnaavoq.
Inuit Ataqatigiit neriuutigaat, nunasiaataanerup nalaani pisimasut toqqarlugit kingumut qiviarneqarnerat mamisitsisinnaassasoq.
- Isumaqarpunga qilerunngortitsinissamut aqqut ingerlavissarigipput: ikivut mamisissavavut. Tamanna pissaaq ataatsimoorluta mamisitsiniaqatigiinnitsigut. Taamaattumi-una ukiuni makkunani, Danmarkimik oqaluttuarisaaneqatigiinnitsinni pisimasut arlalissuit qulaajarniarsarigivut, pisimasut Nunatsinnik ikiliisimasut, uatsinnik kalaallinik sakkortuumik annersitsisimasut, itisuumillu aliasutsitsisimasut, Asii Chemnitz Narup oqarpoq, Kalaallit Nunaata nunasiaataaneratni ingerlatsinermut pissutsit pillugit qulaajaasoqarnissaa nunasiaataajunnaarsitsinermullu tunngasut Inatsisartuni oqaluuserineqarmata.
Aviisi AG taama allappoq.
Asii Chemnitz Narup, isumaginninnermi perorsaasuusoq – aamma aliasuutinik ajornartorsiutinillu katsorsaanermi ilinniagaqarsimasoq – naapertorlugu puiorusutaq uteqqittuaannarpoq.
- Takkuteqqittarporli amiilaarnartorsuatut isikkoqarluni. Nunatta nunasiaataajunnaarsikkiartuaarneqarnerani pisimasunik nassuiaaqqissaarnissaq, nunasiaataasimasullu nunasiaataajunnaarsikkiartuaarneqarnissaannut Naalagaaffiit Peqatigiit piumasaqaataannik Danmark naammassinnissimanersoq ilanngullugu, taakkuussapput toqqarlugit isigisassavut. Taama iliornikkut oqaluttuarisaanerup eqqortup ilisimalernissaanut periarfissaqalissaagut. Amiilaarnartut isaasigut toqqarlugit isigissavavut. Ingerlaqqinniassagatta. Neriuutivut, takorluukkavut aamma angorusutavut kingumut isiginerussanngimmata – iperaasariaqarpugut - siunissamut isigaluta neriuutivut, takorluukkavut angorusutavullu pilersikkiartuaassavavut, Asii Chemnitz Narup nassuiaavoq.
Aviisimi AG-mi atuarnerusinnaavutit. Aviisi uani pissarsiariuk:
