takornarissat
Ikittunnguit amerlasoorsuarnit pitsaanerupput
Takornariat eqqortut tikittassappata takornariat ikinnerusut illoqarfinni inuiaqatigiinnut isertitaqaataanerussasut Erik Bjerregaard naliliivoq
Takornariaqarnermi piorsaaneq. Tamannaavoq naalakkersuinermik suliaqartut Ilulissani Nuummilu mittarfinnik talliliinissanut aamma Qaqortumi nutaamik mittarliornissamut 3,6 milliarder koruuninik aningaasaliisoqarnissaa tunngavilersuutigileraangamikku oqaaseq taanna pingaarnersaatittarpaat.
Naalakkersuinermilli suliaqartut piorsaaneq kisiat eqqartorpaat. Takornariat amerlinerisa kingunissaat aamma tamatuma illoqarfinni innuttaasunut takornariallu malitsigisaannik suliffissuaqarnermut qanoq piumasaqaatitaqarnersoq eqqartunngilaat.
Oqallittoqartariaqarpoq
– Inuiaqatigiit suniarnerlugit, takornariat qanoq ittut kissaatiginerlugit, qanoq amerlatigisut inissaqartinnerlugit, qanoq sullisissanerivut, sulissaqarneq, unnuiffiusinnaasut, illoqarfinni attaveqaatit, eqqiluisaarneq peqqinnissaqarfimmullu kingunissat il.il. pillugit oqallittariaqarpugut, angallassinernik suliaqarluartut ilaat Hotel Arcticimi pisortaq, Erik Bjerregaard, Visit Greenlandimi siulersuisuni aamma ilaasortaasoq, oqarpoq.
Sermitsiaq aviisi allappoq.
– Kisianni umiarsuarni takornariartaatini assersuutigalugu umiarsuit mikinerusut 200t inorlugit ilaasullit ilaasui umiarsuarsuarnit takornariartaassuarnit 1.000it sinnerlugit ilaasoqarsinnaasut ilaasuinit, akerlianik pinngortitamik nungullarsaanerusunik, amerlanerusunik illoqarfinni aningaasaliisartut misigisarparput, Erik Bjerregaard, oqarpoq.
Islandimiunit ilinniarta
Innermik anitsisoqarnerata aningaasameertoqarneratalu kingorna Islandimit misilittakkat, tassa ukiuni kingullerni qulini takornariat amerleriarujussuarsimapput, innersuussutigai. Islandimi tamatuminnga nittarsaassinernut aningaasarpassuit atorneqarsimapput angusaqartoqarsimallunilu. Kisianni Islandimiut aamma ajornartorsiuteqalersimapput.
Allaaserisaq tamakkerlugu Sermitsiaq avisiimi atuaruk: