Ikiorsiissutit: Aalisartut katillugit 1,4 millioner koruuninik taperneqarsimapput

Aalisartunut ikiorsiissutit oktoberip aallartilaarnerani atuutsinneqalernerannit, saattuarniartunut, raajarniartunut saarullinniartunullu 1,4 milliuunit koruunit sinnilaarlugit tapiisoqareersimavoq. Tapiissutit amerlanerpaartaat saarullinniartunut tunniunneqarsimallutik.

Inuussutissarsiornermut Naalakkersuisoq, Jens-Frederik Nielsen (D) aalisarnermut, piniarnermut nunalerinermullu ataatsimiititaliamit ammasumik siunersiorneqarami taama ilisimatitsivoq.

Coronap ajornartoortitsinera saarullinniartunut eqquingaatsiarpoq. Tapiissutit tunniunneqareersut affaat saarullinniartunut tunniunneqarsimapput.

- Taakkunannga 720.000 koruunit sinnilaarlugit saarullinnik aalisartunut tunniunneqarsimapput, Jens-Frederik Nielsen oqarpoq.

Kingumoortumik akiliisarneq

Aalisarnermut, piniarnermut nunalerinermullu ataatsimiititaliap, Henrik Fleischerimit siulittaaffigineqartup, Inuussutissarsiornermut Naalakkersuisoq, Jens-Frederik Nielsen ammasumik siunersiornissaanut novemberip qulingiluaani ualikkut aggersarpaat. Ataatsimiititaliap paaserusuppaa coronap ajornartoortitsinerata nalaani aalisartunut ikiorsiissutit pillugit Naalakkersuisut qanoq pilersaaruteqarnersut.

Aalisakkat akii 15 procent qaangerlugu apparnerannit, akiisa 10 procentii tullii tapiissutitut aalisartut tigusinnaavaat. Naalakkersuisut tunitsivinnut isumaqatigiissuteqarsimapput, aalisartut tunisineranni akit apparsimavallaartillugit tapiissutit aalisartunut toqqaannaq tunniunneqartartunngorlugit, tunitsiviillu allaffissornikkut qinnuteqartartussanngorlugit.

- Tapiissutit 1. august aallarnerfigalugu atulersut, kingumoortumik tunniunneqartarput. Sumiiffiit ilaanni tapiissutit tunniunneqarnissaat kinguaattooqqalaarsinnaavoq, Inuussutissarsiornermut Naalakkersuisoq oqaluttuarpoq.

Qalerallit tapilerneqanngillat

KNAPK siusinnerusukkut ilisimatitsisimavoq qalerallit taperneqartalernissaat soqutigilluinnarlugu. Tamannali maannamut pilersaaruteqarfigineqanngilaq:

- Naalakkersuisut maannakkumut pilersaaruteqanngillat qaleralinniartut ikiorsiissutinik taperneqartalernissaat pillugu. Naalakkersuisut aamma maannakkumut pilersaaruteqanngillat ikiorsiissutit decemberimut killeqartut sivitsornissaannut, pissutsilli qanimut nalilersorneqartuaannarput, Jens-Frederik Nielsen ataatsimiititaliamut oqarpoq.

Aalisartunut ikiorsiissutinut 11,1 milliuunit koorunit immikkoortinneqarsimapput, ikiorsiissuteqarnerlu augustimiit 31. december 2020 tungaanut atuutsinneqarluni.