Ikiorsiissutit tapertassaat ilusilersorneqarput

Naalakkersuisut ikiorsiissutaat inuussutissarsiornermik ingerlataqartut ataatsimut isigalugu naammagisimaarluarpaat, taamaattorli Sulisitsisut peqatigiiffiata ilaasortaasa kissaatigaat ikiorsiissutit taakku ”pitsanngorsarneqassasut sivitsorneqassasullu” 30. junip kingorna ikiorsiissutit ingerlaannarniassammata. Kissaat Naalakkersuisut tungaannit tusaaniarneqarlunilu iliuuseqarfigineqarpoq.

Jess Svane (S) ilisimatitsivoq junip kingorna sulisoqarnermut inuussutissarsiornermullu ikiorsiissutit junip naaneranut killeqartinneqartut ingerlaqqissinnaanissaannut Naalakkersuisut piareersimasut.

Inuussutissarsiornermut naalakkersuisup Jess Svane (S)-ip maannangaaq oqaaseqarfigiumanngikkallarpaa nunatsinni inuussutissarsiuteqartunut ikiorsiissutit piffissaliussaq qaangiuppat qanoq taarteqartinneqassanersut aammalu qanoq annertutigissanersut.

Aviisi Sermitsiaq taama allappoq.

Taamaattoq isertuarani erseqqissaateqarpoq inuussutissarsiornermik ingerlataqartut nalaataminnut atatillugu patajaallisarneqarnissaminnut pisariaqartitsinerat piffissamut killiliussamut sanilliullugu annertunerusinnaasoq.

Ilaatigut sulisitsisut sivitsuinissamik noqqaassuteqarnerat tunngavigalugu ikiorsiissutit junip naanerata kingorna nanginneqarnissaat qanoq iluseqartinneqaassanersoq pillugu Naalakkersuisut sulissuteqarlutik aallartereernikuupput.

- Naak piffissap imaalinerani coronap ajornartorsiortitsinera annikilliartulernikuusoq kisitsisitigut takussutissaqarlualereeraluartoq aammalu nunat tamalaat akornanni mattusimareernerup kingorna nunat killeqarfiinik ammaasseqqinnissamik siunertaqarluni suliniutit ingerlanneqalereeraluartut, taamaattoq suli apeqquterpassuit akissutissaqartinneqanngitsut erfapput, taamaalillunilu maannangaaq inerniliisoqarsinnaanngilaq corona aqunneqarsinnaalereersoq. Coronap ajornartoortitsinerata kingunerisaanik kingunerluutit ilaat allaat ukiut arlallit atorlugit iluarsiniagassaassasut qularnanngilaq. Tassani pingaartumik nunat tamalaat inuussutissarsiornermik ingerlatsisortaat ingerlaqqinnissaminnut pissutsinullu nutaanut naleqqussarnissaminnut piffissamik pisariaqartitsinissaat avaqqunneqarsinnaanngilaq, Jess Svane (S) Sermitsiamut oqarpoq.

Jess Svane (S) erseqqissaateqarpoq inuussutissarsiornermik ingerlatsisunut tusarnaarnissatut aamma pingaaruteqartigisoq politikkikkut sakkussanik pissarsinissaq siunertaralugu partiinut tusarnaarnissaq, pingaartumik aamma nunap nunanut allanut ammariartuaartinneqarnera eqqarsaatigalugu:

- Pisut nalaatat pillugit Inatsisartut isummersortussaapput aammalu ilaatigut nunatta ammaateqqinneqarnissaa pillugu qanoq iliortoqarnissaa oqallisigineqarpat naatsorsuutigaara sulinitta nanginnissaanut sakkussatsinnik pissarsilluarsinnaassalluta, Naalakkersuisuni ilaasortaq Jess Svane (S) erseqqissaavoq.

Aviisimi Sermitsiami atuarnerusinnaavutit - aviisi uani pissarsiariuk:

Powered by Labrador CMS