Ikiorsiissutit akuerineqarput - Partii Naleraq kisimiippoq
Kalaallit Nunaanni suliffeqarfiit akiliisinnaajunnaarnissamik ulorianartorsiortunut Naalakkersuisut ikiorsiissutissat suliatt aningaasaqarnermut ataatsimiititaliami amerlanerussuteqartunit akuerineqarpoq. Partii Naleraq suliami kisimiippoq.
Akileraartarnermut Aningaasaqarnermullu Ataatsimiititaliami siulittaasoq Hermann Berthelsen (S) Naalakkersuisunut nalunaaqutaq 10.00 ilisimatitsivoq, nunatsinni suliffeqarfinnut ikiorsiissutissat amerlanerussuteqartut akuerigaat.
Partii Nalerarli amerlanerussuteqartunut, inuussutissarsiornerup iluani ikiorsiissutinut akuersisunut ilaanngitsoq paasinarsivoq.
Coronavirusip ajalusoortitsinerani, immikkut pisuusutut isigineqarsinnaasumi, ataatsimiititaliami amerlanerussuteqartut akisussaatut imminnut inissipput, Naalakkersuisut inatsisissamik Inatsisartuni suliarineqaqqaartussamik aallartitsinngikkaluarlutik suliffeqarfinnut aningaasaliisinnaanngortillugit.
Takornarialerinerup iluani suliaqartullu allat assigusut akornanni piaarnerpaamik ikiorsiisoqarnissaa pisariaqartinneqartutut nassuiaatigineqarpoq.
Aningaasaqarnermut ataatsimiititaliami amerlanerussuteqartut aalajangiinerat Naalakkersuisunut nassiunneqarpoq, Partii Naleqqalli ikinnerussuteqartutut oqaaseqaataa ilanngunneqarani.
- Ikinnerussuteqartutut oqaaseqaat ullaaq manna nalunaaqutaq 9.45 tigusimannginnatsigu, ataatsimiititaliami siulittaasup tullia isumaqatigalugu aalajangerpunga amerlanerussuteqartut aalajangiinerat Naalakkersuisunut nalunaaqutaq 10.00 apuutissallugu, Hermann Berthelsen ilisimatitsivoq.
Partii Naleqqami aningaasaqarnermut ataatsimiititaliami ilaasortaq Jens Napaattooq Sermitsiaq.AG-mut ilisimatitsivoq ikinnerussuteqarlutik oqaaseqaat ippassaq nassiunneqareersimasoq.
- Ikinnerussuteqarluta oqaaseqaaterput nassiutereerparput, Partii Naleqqamit ilaasortaq oqarpoq.
Kisimiippugut una pissutigalugu
- Isumaqanngilagut pisinnaatitsissut taamaattoq Naalakkersuisunut tunniussinnaallugu. Inuussutissarsiornerup iluanut tunniunneqartussat aningaasarpassuit pineqarput, isumaqarpugullu taamaaliulinnginnermi Inatsisartut ikinnerpaamik 16-it suleqataasariaqartut, Jens Napaattooq nassuiaavoq.
Taassuma erseqqissarpaa partiip suliffeqarfiit pisariaqartitsingaatsiartut ikiorusukkai. Ilanngullugu erseqqissarpaa partiip siusinnerusukkut oqariartuutigisimagaa Inatsisartuni ilaasortat katersorneqartariaqartut, suliap ima ittup pinartutut suliarineqarnissaanut piareersimanissaat anguniarlugu.
- Nuna manna inatsisit malillugit ineriartortittariaqarparput, tamakkulu torersumik suliarineqartariaqarput. Taavami missingersuutinut inatsit, ikiorsiissutit pinngitsooratik kalluagassaat, nunattalu karsianik kalluaasussat, Jens Napaattooq aperivoq.
Politikerit arlallit Sermitsiaq.AG-p attaveqarfigisimasaasa paasisinnaanngilaat sooq pisut inuussutissarsiornerup iluani kipiluttunartut Partii Naleqqap politikkikkut iluanaaruteqarfiginiarnerai.
Ikiorsiissutissatut siunnersuutit milliardilikkuutaanik aningaasartallit Danmarkimi ippassaq saqqummiunneqarput. Siunnersuut siulleq arlalinnik malitseqassaaq. Folketingimi ilaasortat tamarmik danskit naalakkersuisuinut tamatigut tapersiisarput.