anngiortumik eqqussuineq
Ikioroornartuerniarneq pillugu suliaq annerulertoq
Nuummi politiit annertuumik suliaqarneranni inuit arfineq marluk juulip 26-annili tigummigallarneqartut, suli juulli aamma ukiortaaq qaangerlugu tigummigallarneqassapput.
Taakku tamarmik peqatigiillutik hash 15 kiilu tikillugu anngiortumik eqqussuisimasutut unnerluunneqarput.
Suliaq annertusiartorpoq
Suliaq hashi pillugu suliani Nunatsinni annersaasa ilaattut oqaatigineqartoq, annertusiartorpoq, tamanna politiit tusagassiuutinut nalunaarutaanni atuarneqarsinnaavoq.
Tassami ullumikkut sivitsuisoqarnerani arfineq-marluusunit tallimanut unnerluutigineqartut annerulersinneqarput, taamaalillutik maanna 2015-imiilli hashimik katillugu 63 kiilumik Danmarkimit Nunatsinnut eqqussuisimasutut unnerluutigineqalerput.
- Arnap 20-t sinnerlugit ukioqartup unnerluussutini assinganik annerulersippai, taamaalilluni allat taakku peqatigalugit 2016-miilli hashimik 14 kiilup missaaniittumik eqqussisimasutut unnerluutigineqarluni, unnerluussisussaataasoq, Tobias Berg, ilisimatitsivoq.
Tamarmik pinngitsuunerarput.
Allat amerlanerusut unnerluunneqarput
Misissuinermut annertuumut atatillugu amerlanerusut unnerluutigineqarput, tamanna manna ilisimatitsissutigineqarpoq. Pineqartut taakkununnga attuumassuteqartut politiit ilimagaat.