Ikiaroornartumik tigummisaqarsimasutut pineqaatissinneqartoq
Ikiaroornartoq hashi 49 gram politiit Nuussuarmi inissiami naammattuugaat, nassaajua imaluunniit tuniniagassaava? Eqqartuussivimmi isumaqarput tuniniagassaasoq pinerloqqittoqassappallu ulluni arfineq-marlunni parnaarussaanermik pineqaatissiissutaassalluni.
Angut 29-nik ukiulik ukiup ataatsip ingerlanerani pinerluuteqaqqissaguni sapaatip-akunnerani ataatsimi pineqaatissinneqarsimasunut inissiisarfimmiittussanngorlugu, sapaatip-akunnerani kingullermi eqqartuunneqarpoq.
Aviisi AG taama allappoq.
Tamatuma saniatigut angut ilassutitut 4.900 koruuninik akiliisussanngortinneqarpoq eqqartuussinermilu aningaasartuutinut akiliisussanngortitaalluni. Suliassaq ukiut sisamaata affaata matuma siornagut, tassa oktobarimi 2015-imi pisimasoq, Eqqartuussisoqarfik Sermersuumi taama aalajangiiffigineqarpoq.
Piffissami tamatumani politiit unnerluutigineqartup najugaani Nuummi illoqarfiup immikkoortortaani Nuussuarmi uppernarsaatissanik ujaasinerminni ikiaroornartoq hashi 49 gram angutip jakkiata kaasarfianiittoq nassaaraat tamatumalu saniatigut aningaasat 4.650 koruunit ilanngullugit nassaaralugit. Politiit isumaqarput 29-nik ukiullip ikiaroornartoq hashi tuniniagassamisut tigummigaa, aningaasallu tigummisai ikiaroornartumik hashimik tuniniaanermit isertitaasut.
Taamaattumik angut ikiaroornartut pillugit nalunaarut naapertorlugu unnerluutigineqarpoq. Taassuma eqqartuussivimmut sassartinneqarnissani ukiut pingasut sinnerlugit utaqqivaa.
Ilaatigut tamanna pissutigalugu eqqartuussiviup unnerluussisussaatitaasut pinerluuteqaqqissaguni ulluni 14-ini pineqaatissinneqarnissaanit sakkukinnerusumik pineqaatissippaa.
Nassaaq
Unnerluussisussaatitaasut Steffen Lyngemit saqqummiussisoqartut isumaqarput, unnerluutigineqartoq inatsimmik ikiaroornartunut tunngasumik qularutissaanngitsumik unioqqutitsisimasoq.
Unnerluutigineqartulli illersuisuata Wilhelm Mallingip oqaatigaa, unnerluutiginnissutigineqartumut pineqaatissiissutigineqartumulluunniit uppernarsaatissaqanngitsoq.
- Ikiaroornartoq hashi nassaajuvoq. Inatsisilerinikkut isigalugu nassaaq pineqarpoq, illersuisoq oqarpoq.
Aviisi AG-mi nutaami sooq illersuisup hashi nassaajunerarneraa pillugu, taamatullu unnerluussisussaatitaasup eqqartuussivimmi saqqummiussai atuarnerusinnaavatit. Aviisi AG uani ataani pissarsiarisinnaavat: