ikiaroornartumik eqqussuineq
Ikiaroornartumik eqqussuisunut sakku nutaaq: Timimut skanneri aamma anarsaat
Timimut skanneri qaammatini marluinnarni atorneqarsimasoq ikiaroornartumik eqqussinerit arlallit paasineqarnerinik kinguneqartitsereerpoq.
Aningaasaqarnermut Akileraartarnermullu Ataatsimiititap 2016-imi juunimi timimut skannerimik pisinissamut 2 millionit koruuninik aningaasaliissuteqarpoq, taassuma Kangerlussuarmut mittarfimmut tikittut ikiaroornartumik iisaqarsimanersut takutissinnaavaa.
Akitsuuserisut ilaat inummik pasitsaassaqarunik, pineqartoq skannerikkut ikiaaroornartumik iisaqarsimanersoq qulakkeersinnaavaat.
- Atortumik pitsaasumik peqalersimanerput qularutissaanngilaq, Akileraartarnermut Aqutsisoqarfimmi Nuummi immikkoortumi pisortaq, Ferdinand Hammeken ilisimatitsivoq.
Inuit tallimat arfinillit paasineqartut
Skanneri decembarip qiteqqunnerani atorneqalerpoq, qaammatillu marluk qaangiuttut inuit tallimat arfinillit ikiaroornartumik eqqussisut paasineqareerput.
Oqartussat ''aanngajaarniutit eqqunneqaqqusaanngitsut'' paasinissaannut periarfissagissaarnerulertut taassuma naqissuserpaa.
Inuup aanngajaarniutinik inerteqqutaasunik iisisimaneranik timimut skanneri naap iluani inalukkaniittuni takutitsippat, taava pineqartoq politiinut tunniunneqartarpoq, taakkulu suliaq ingerlateqqittarpaat.
Kalaallit Nunaanni Politiit assimik saqqummiusseqqammerput, tassanilu takuneqarsinnaavoq eqqussisup hashi foliamik mikisunngorlugit poortorsinnarlugit iisimagai.
Anarsaat
Eqqussisoq anarsaatitornissamik piumaffigineqarpoq, assimilu ikiaroornartoq eqquteriarneqarsimasoq takuneqarsinnaavoq.
- Hashimik eqqussisoq aaqqatinik gumminik tunineqartarpoq, hashillu iiorarsimasat annat akornanniittut nammineq salittarpaat, Nuummi politiini pigaartut pisortaat, Johan Wesent nassuiaavoq.
Hashimik eqqussisartut Kangerlussuarmi kisimi paasineqarneq ajorput. Nuummi inunnik pasineqartunik aamma Dronning Ingridip Napparsimmavissuanukaassisoqartartoq, tassanilu pasineqartut timaannik skannerinermut atortut pigineqartut atorneqartartut, politiini pigaartut pisortaat ilisimatitsivoq.
- Hashimik eqqussisut paasigaangatsigit amerlanertigut aanngajaarniutit iineqarsimasarput, Johan Westen ilisimatitsivoq.
Pasilliinermut tunngavik
- Akitsuuserisut qimmii Nuummi mittarfinni nassatanut qisuariarpata, taava pasilliinermut tunngavissaqartarpugut, tamatuma kingorna napparsimmaviliaattarpagut, politiineersoq oqaluttuarpoq.
Mittarfinni nunanut allanut toqqaannartumik atassuteqartuni allani skannerinik pisariaqartitsisoqarnersoq, Akileraartarnermut Aqutsisoqarfimmi pisortap Ferdinand Hammekenip oqaaseqarfigerusunngilaa.