iliuuseqarneq

Ikiaroornartumik atornerluisoqarnerata oqallisigineqarnera nuannaarutigineqarpoq

Ilinniarfeqarfinni atornerluisoqannginnissaa anguniarlugu naalakkersuisumit iliuuseqarfigineqassaaq

Ilinniartitaanermut, kultureqarnermut, ilisimatusarnermut ilageeqarnermullu naalakkersuisoq Nivi Olsen, Demokraatit

Imarsiornermik Ilinniarfimmi atuartut ikiaroortarnerat ajornartorsiutigineqartoq pingasunngormat allaaserineqarpoq.

Ilinniartitaanermut naalakkersuisup Nivi Olsenip ajornartorsiutip oqallisigineqarnissaa pingaartippaa, kiisalu Imarsiornermik Ilinniarfimmit taamatut oqariartuuteqartoqarnera nuannaarutigalugu.

- Isumaqarpunga pingaaruteqartoq ajornartorsiut atuuttoq nassuerutigissallugu, oqallisigilissallugulu. Taamaattumik uanga Imarsiornermik Ilinniarfiup pisortaanut Jeppe Carstensen-imut oqaatigereerpara suliniut aallartinneqartoq tapersersorakku, tamannalu oqaluuserereerparput, Nivi Olsen tusagassiuutinut nalunaarummi oqarpoq.

- Naalakkersuisoqarfimma maanna siunnersuusiorpaa qanoq aaqqissuussinitsigut atornerluinermut sammisumik suliniutit nukittorsarsinnaanerigut, atornerluineq ikiaroornartumut hash-imut, imigassamut allamulluunniit sammisuunersoq apeqqutaatinnagu, naalakkersuisoq oqarpoq.

Katsorsaasarnerit
Ilinniartut ikiaroornartumik allanilluunniit ajornartorsiutillit ajornannginnerusumik katsorsarneqartarsinnaalernissaat aamma naalakkersuisup pingaartippaa.

- Pingaaruteqarpoq uagut ilinniartitaanermik ingerlatsinermi inissisimasugut atornerluinermut tunngatillugu aalajangersimasumik ersarissumillu politikkeqarnissarput, kisiannili aamma pingaaruteqarpoq naalakkersuinikkut akisussaaffigut akimorlugit ataatsimoorluta iliuuseqarnissarput, ajornartorsiuteqarnerminnik nassueruteqarsimasut qaangeerusuttullu ikiorsinnaajumallugit, naalakkersuisoq oqarpoq.

Powered by Labrador CMS