dom
Ikiaroornartulerisut pineqaatissinneqartut
Inuit arfineq marluk anngiortumik hashimik eqqussuisimasutut pisuutinneqartut pineqaatissinneqarput
Inuit arfineq-marluk hashimik 12 kilo sinnerlugu anngiortumik eqqussuisimasut Sermersuup eqqartuussiviani ullumi pineqaatissinneqarput. Ikiaroornartumik nunatsinnut 16-eriarluni eqqussineq pisimavoq. Eqqussineq nassiussinikkut pinngikkuni ikiaroornartulerisut namminneq angalallutik eqqussorsimavaat.
Poortukkamik nassaartoqartoq
Timmisartoqarfimmi nassiussanik misissuisartut poortukkamik hashimik 4 kilomik imalimmik nassarnerisigut suliaq aallartinneqarpoq. Misissuinermilu 15-eriarluni ikiaroornartunik eqqussisoqartarsimanera paasineqarluni.
Tunuliaqutaasumut ukiut pingasut
Tunuliaqutaasutut ilimagineqartoq ikiaroornartumik kilot qulit sinnerlugit eqqussuisimasutut ukiut pingasut isertitsivimmiittussanngorlugu pineqaatissinneqarpoq. Taassumalu saniartigut eqqartuussiviup 600.000 koruunit arsaarinnissutigalugit.
Pineqartut sinneri arfinillit piffissanik assigiinngitsunik pineqaatissinneqarput.
- Suliamut pingaaruteqartumut eqqartuussiviup inerniliinermigut isumaqatigimmatigut naammagisimaarinnissutigaarput, politiassistenti Ulloriaq Grønvold unnerluussisuusoq oqarpoq.
Eqqartuunneqartut saniatigut inuit tallimat akiligassinneqarput. Taakku eqqartuunneqartunut aningaasanik annertunngitsunik ikiuussimanertik naak aningaasat ikiaroornartulerinermit isertitsissutaasut nalunngikkaluarlugu akiligassinneqassutigalugu.
- Ikiaroornartulerinermut attuumassuteqartut tamaasa uani suliami pineqaatissinneqarnissaat sulissutigivarput. Soorlu Aningaasat ikiaroornartulerinermit isertitsissutaasimatillugit aningaasanik nuussinermi ikiuuttut aamma akiligassinneqarsinnaaneri eqqumaffigineqartariaqartoq, Ulloriaq Grønvold erseqqissaavoq.