ikiaroornartoq
Ikiaroornartuerniatut pasineqartut arfineq-marluk tigummigallarneqartut
Politiit annertuumik suliaqarneranni Nuummi aamma Danmarkimi hashimik tuniniaasutut pasineqartut, marlunngornerup unnuaani inuit arfineq-marluk sapaatip-akunnerini sisamani tigummigallarneqartussanngorput.
Sivisuumik misissuisoqarnerata kingorna politiit aallaasilisartut Nuummi sumiiffinni arlalinni aamma Danmarkimi sumiiffimmi ataatsimi suliaqarneranni tigusarinnipput.
Sisamat iperagaasut
Katillugu inuit aqqanillit tassani tigusarineqarput, kisianni marlunngornerup ingerlanerani inuit sisamat iperagaapput, eqqartuussisumullu sassartinneqanngillat, unnerluussisussaatitaasoq Tobias Berg tusagassiuutinut nalunaarummi ilisimatitsivoq.
Angut Danmarkimiittoq sapaatip-akunnerini sisamani tigummigallarneqartussanngorpoq, Nunatsinnukartinneqassallunilu, tassanilu Sermersuup Eqqartuussiviani Nuummi eqqartuussisumut sassartinneqassalluni. Angut 30-leereersimavoq.
Angutit tallimat arnarlu ataaseq
Marlunngornermi ualikkut unnuap tungaanut Nuummi tigusarineqartut tunngaviusumik inatsit naapertorlugu killisiorneqarput, tassanilu tamarmik aggustip 22-ata tungaanut tigummigallarneqartussanngorlugit eqqartuussisup aalajangiuppaa.
Tassani angutit tallimat aamma arnaq ataaseq pineqarput - tamarmik 30-liisimanngitsut - taakkunannga ataatsip eqqartuussisup aalajangernera Nunatta eqqartuussisuuneqarfianut suliareqqitassanngortippaa. Sinnerisa tigummigallarneqarnissartik akueraat.
Killisiuineq matoqqasoq
Hashi pillugu suliami misissuineq suli naammassinngilaq, tamannalu tunngavigalugu killisiuineq matoqqasumik ingerlanneqarpoq. Taamaattumillu politiit suliaq pillugu itisileerusunngillat, Tobias Berhip tusagassiuutinut nalunaarutaani nalunaaqutaq 2.21 pingasunngornermi unnuakkut nassiunneqartumi tamanna atuarneqarsinnaavoq.
Aamma atuaruk: Nuummi politiit annertuumik suliaqartut - assersuisoqarunnaarpoq