Ikerasammiut saliisitsinermi ajugaapput
Pinngortitap Paarsisuisa illoqarfimmi meeqqat sumiiffiini saliisitsinermi ajugaasut toqqarpaat.
Ikerasammi innuttaasut Nunatsinni pinngortitami saliillaqqinnerpaatut toqqarneqarput 3.000 koruuninillu eqquillutik.
Pinngortitap Paarsisui, innuttaasunut pinngortitamik paarinninnissaannik Naalakkersuisut kajumissaariniarlutik suliniutigisaat, meeqqat sumiiffiini eqqakkanik katersilluarnerpaanik eqimattamik toqqaapput.
Unammisitsineq piffissami 5. maajimit 14. juunimiut ingerlavoq, tassani innuttaasut, suliffeqarfiit, atuarfiit ulluuneranilu paaqqinnittarfiit tamarmik peqataasinnaapput. Peqataasut sumiiffimmi saliilinnginnermi saliinerullu kingorna assiliinissaat piumasaqaataavoq.
Pinngortitap Paarsisuisa oqarnerat naapertorlugu Ikerasammi Uummannap eqqaaniittumi nunaqarfimmi innuttaasut nunaqarfik tamakkerlugu eqqakkanik saliipput, tamatumalu saniatigut aalajangersimasumik saliisarnissamik aaqqiissummik isumaqatigiissusiorsimapput.
Pinngortitap Paarsisuisa Facebookimi qupperneranni peqataasut allat takusinnaavatit.