Ikaartarfik nutaaq sapaatiuppat ammarneqarpat arpatsitsisoqassaaq
Ikaartarfik sapusiarlu nutaaq Nuummi naluttarfiup eqqaaniittut sapaatiuppat ammarneqassapput atoqqaarfissiorneqarlutillu. Aqqummik nutaamik atoqqaarfissiorneq Kommuneqarfik Sermersuup nalliuttorsiutigissavaa.
Ikaartarfik piffissami sivitsortumi utaqqineqarsimasoq, Qinngorpumiit Nuussuup tungaanut aqqutit ilagilertussaasaat, atorneqarnissaminut piareerpoq sapaatiuppallu atoqqaarfissiorneqassalluni. Aqqummik nutaamik ammaaneq arpatsitsinermik malunnartinneqassaaq.
Kommuneqarfik Sermersooq, atoqqaarfissiortitsinissami aaqqissuisuusoq Sermitsiaq.AG-mut ilisimatitsivoq.
Ikaartarfikkut arpanneq
Aaqqissuussaq sapaatiuppat nalunaaqutaq 12:30 aallartissaaq, borgmester Charlotte Ludvigsen oqalugiassalluni ikaartarfimmillu atoqqaarfissiortitsissalluni.
Kingorna arpattoqassaaq “Ikaarneq”-mik taallugu aaqqissuussamik, arpaqataasussat 2 kilometerisut imaluunniit 5 kilometerisut isorartutigisumut arpannissamut peqataasinnaapput. Arpatsitsinermi arpattut, sikkilertut, rulleskøjtertut allallu peqataasinnaapput.
Ikaartarfimmi Hinnarik allallu aliikkusersuissapput, meeqqallu kiinnamikkut qalipatsissinnaassallutik.
Aaqqissuussaq nalunaaqutaq 17:00 naammassippat aqqusineq ikaartarfiusoq biilertunut ammarneqassaaq.
Aqqusinikkut ingerlaarneq sivikinnerusoq
Ikaartarfik atulerpat Nuussuarmi biilinik ingerlaneq isumannaannerulissaaq, aqqusinikkummi ingerlaartorpassuit talittarfittaakkoortinneqartalissapput illoqarfiup ilaatigut ingerlaarnatik.
Taassuma saniatigut naatsorsuutigineqarpoq Qinngorpumiit biilertut ullaakkut ualikkullu sullorsuakkoornerusalissasut, aqquserngillu sinneri atorneqarneri annikinnerulissallutik. Taamaasiornikkut aqqusinerni biilit tunuleriaattut ikinnerulissapput, biilerlunilu ingerlaarsinnaaneq sivikinnerulissalluni.
Ikaartarfiup sapusiallu sanaartorneqarnerat katillugit 147,5 milliuunit koruuninik aningaasaliiffigineqarsimavoq. Ikaartarfiliornissamut suliaq aasakkut 2015-imi aallartinneqareerpoq. Aningaasaliussat sippornagit suliaq ingerlavoq, piffissarlu eqqorlugu naammassineqarsinnaasimalluni, naak ikaartarfiliornermi unammilligassaqaraluartoq, soorlu ikaartarfissap ikkunneqarnissaani umiarsuaq atorneqartoq ikkarlissimagaluarmat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
