Iioraalluni eqqusseriartoq Kangerlussuarmi tigusarineqartoq
Angut ikiaroornartumik hashimik iioraasinnarluni nunatsinnut eqqusseriartoq politiinit ataasinngormalli tigummigallarneqarsimavoq. Maanna iperagaasimasoq, politiit ilisimatitsipput.
Angut politiinit ataasinngornermi ullaap tungaaniit tigummigallarneqarsimavoq, skannertinnerit takutimmassuk ikiaroornartumik hashimik iioraasinnarluni nunatsinnut eqqusseriarsimasoq.
Angut iioraasinnarluni eqqusseriartoq Kangerlussuarmi tiguneqarpoq, tigummigallarneqartussanngorlugulu kingorna Nuummukaanneqarluni.
- Misissuinermi paasivarput hashimik iioraasimasoq. Iperagaannginneranilu soorunami qulakkeerusussimavarput iisai tamakkerlutik anisimassasut, Kalaallit Nunaata Politiivini pigaartuni pisortaq Palle Augustinussen Sermitsiaq.AG-mut oqarpoq.
Angut qanoq annertutingisumik iioraasimanersoq politiit ilisimatitsissutiginngilaat.
Tunngaviusumik inatsit naapertorlugu eqqartuussivimmi sassartinneqangajattoq
Angutip iperagaannginnerani iisimasai tamakkerlutik anisimanissaat qulakkeerumallugu, angut eqqartuussivimmi tunngaviusumik inatsit naapertorlugu sassartinneqassasoq politiit qinnutigigaluarpaat. Pigaartulli pisortaat ilisimatitsivoq eqqartuussivimmut sassartinneqarnissaq sioqqutitsiarlugu iineqarsimasut tamakkerlutik anisimasut, taamaattumillu tigummigallarneqartoq iperagaasimalertoq.
Iioraasimalluni eqqusseriartoq alla Kangerlussuarmi januarip naanerani aamma tigusarineqarpoq. Skannertinnermi tassani paasineqarpoq angut poortanik mikisunik 100-t missaanniittunik iisisimasoq.
Taama iliorluni eqqusseriartarneq politiinit mianersoqqussutigineqarsimavoq. Iiseriarlutik eqqusseriartut pingasut siorna taamaaliornerminni toqusimapput.