Igasut iluatsitsisut containerinut nutsertut
Aalborgimi suliniut Arctic Street Food inersimaleriartorpoq angerlarsimaffimminiillu nuulluni.
Inuussuttut eqimattat Aalborgimi issittoq isumassarsiorfigalugu, tusarrnaartitsinerni aamma festivalini sassassaalliuttakkaminnik nerisassiortartut, sapaatip-akunnerani tussiarfissuanngulersoq najukkaminnit nutserlutik aallartipput. Suliniut Aalborgimi Kalaallit Illuutaanni inissisimagaluartoq, maanna Aalborgip kitaatungaani amutsiviusimasumut nutserpoq.
Arctic Street Food Limfjordværftimi piginnittumit – suliffeqarfimmit sanaartugassanik suliarinnittartumit A. Enggaardimit - akeqanngitsumik nunaminertamik tunineqarput, taanna ulluni tulliuttunit sungiusartarfinngortinneqarlunilu allaffeeranngortinneqassaaq.
Inuusuttut taakku namminneq containerit allanngortillugit igaffimmik atornikumi ikkussiffigissallugu pilersaarutigaat, aammalu siullertut naatsiiviliornissaq pilersaarutigaat, tassani kalaallit naasui mamarsaatissat naatittassagamikkit.
Pølsevogni ingerlatiinnassagaat
Sumiiffimmit nutaamit nerisassanik tuniniaanissartik pilersaarutiginngilaat, naak Aalborg Street Food sanilerigaluarlugu.
- Pølsevognerput ingerlatiinnassavarput, akuulersitsinissamut sulisorineqartoq Mads Sigenfeldt Aalborgimi Kalaallit Illuutaanneersoq, suliniummut aallarneeqataasoq oqarpoq.
Arctic Street Food aallartinnerminiilli iluatsitsilluarsimavoq – DR-illu Nunatsinnut Juullimi inuulluaqqusineranut ilaatigut ilaavoq, aamma kulturikkut aaqqissuussinerni arlalinnit kalaaliminernik nutaalianik tuniniaasarlutik. Suliniut kalaallinik inuusuttunik kajumissutsimik sulisunik 20-nik sulisoqartarpoq.
Suliniut nerisassanik tuniniaanermini iluanaarutinik nammineernissaa takorluugaavoq, kisianni aningaasaateqarfiit aamma suliffeqarfiit arlallit aallartinnera taperserpaat.