Igasoq ilisarisimaneqarluartoq nerisassianik ineriikkanik inerisaassasoq

Toqaraavik Neqi A/S Namminersorlutik Oqartussanit pigineqartoq, Kalaallit Nunaanni niuerfinnut nerisassianik ineriikkanik inerisaaniarluni alloriaqqippoq.

Suliffeqarfimmit tusagassiorfinnut nalunaaruteqarnermi ilisimatitsissutigineqarpoq, igasoq Inunnguaq Hegelund suliassamik isumaginnittussatut atorfinitsinneqarsimasoq.

- Savaaraq arfininngornersiut suli tunisaalluarpoq, soorlu savaaqqamik pizzaatigut aamma ingerlalluartut. Misigisimavugulli tassuuna tungaatigut suli iliuuseqarnerusinnaalluta, pisiniarfinnimi nerisassanik ineriikkanik, soorlu Tulippimeersunit Frigodanimeersuniillu, arlalinnik tunisassaateqartarput, kangiamiusullu nerisassiaat qerisut aamma arlallit pigisarpaat. Uagulli isumaqarpugut arlalinnit iluarineqassasoq, nerisassianik taamak ittunik nunatsinneersunik aamma peqalerpat, Neqi A/S-imi fabrikkimi pisortaq Ole Vestergaard oqarpoq, nangillunilu:

- Taamaattumillu nuannaarutigaarput nunatsinni igasut pikkorinnerpaat ilaat
isumaqatigiissusiorfigisinnaagatsigu nutaanik pisariitsunik nunatsinneersuniillu nerisassanik ineriartortitsinissamut.

Pitsanngorsaaneruniartoq

Nerisassianik ineriikkanik inerisaaniarneq, Neqip nioqqutissiaatiminik annertunerusumik pitsanngorsaarusussimaneranut attuumassuteqarpoq.

Inunnguaq Hegelundip Nuummi neriniartarfik Kalaaliaraq siusinnerusukkut ingerlassimavaa, siornalu nalunaarutigaa Qaqortumi neriniartarfimmik ammaassamaarluni.

Suleqatigiilerneq nuannaarutigigaa:

- Suleqatigiilernerput isumalluarnarpoq, kujataaniimmi nerisassiat mamartut taamaasilluta
siammarternerusinnaalissavagut. Maanna aallartippugut, tunisassiaalerumaartussallu
mamarunarto-rujussuussapput, taanna oqarpoq.

Suliffissanik pilersitsisinnaasoq

Neqi A/S-ip aasaq manna ukiassaq ilanngullugu nerisassiassat nutaat inerisarnerannut
misiliinernullu piffissaq atussavaa, taannalu ingerlanneqassaaq savanik toqoraaffiup aallartinnissaata tungaanut. Nerisassiassallu ineriikkat nutaat ukiup nutaap aallartinneranut
saqqummiunneqarnissaat pilersaarutaavoq

Fabrikkimi pisortap Ole Vestergaardip ilisimatitsissutigaa, nerisassiat ineriikkat saniatigut suleqatigiinneq una allamik aamma imaqarpoq, tassa nunatsinni neriniartarfinnut nutaanik pitsaanerusunillu neqimik uullisarnissamik immitsinnut siunnersoqatigiittalissaagut, kiisalu Neqip perlukuutaat, soorlu savaaqqap tartui, qinersii allallu, aamma eqqarsaataajumaarput:

- Allanik aamma suliniuteqarpugut, soorlu pølsit pujuukkat, savaaqqamit, savamit tuttumiillu sanaat. Umimmammiit sanaat aappaagumut kinguartilaarnikuuagut. Tuttu Jerky, tassa tuttut panertut nereriaannaat, maanna aamma misilittarneqaleruttorput, Ole Vestergaard oqarpoq.

Neqimit neriuutigineqarpoq, suliffiup suliniutai taakku nutaat Narsami suliffusinnaasunik pilersitsiumaartut.