Igalaaminiusaq 'Qaammat' takornarissanit maluginiarneqartalissaaq
Illuaraasaq igalaaminiusoq nunarsuarmioqatinut kingornussassaqarfiup nunaqarfittaani Sarfannguini annertunerusumik malunnartitsilertussaq atoqqaarfissiorneqarpoq. Illuaraasamiit Ikertuumut Sarfartuumullu isikkiveqarpoq, pisuttut angalasullu sanaartugaq takusinnaallugu.
Illuaraasaq igalaamiunisoq issittumut naleqqussagaq ukiullu ingerlanerani silap allanngorarnerini malinnaajuartussaq nunarsuarmioqatinut kingornussassaqarfiup nunaqarfittaanut annertunerusumik soqutiginnilersitsinissaa naatsorsuutigineqarpoq.
Illuaraasami sanaartortoq isumassarsisorlu tassaavoq nammineq kajumissutsiminik illussanik titartaasartoq Konstantin Ikonomidis, Nunarsuarmioqatinut kingornussassaqarfik Aasivissuit - Nipisat sinnerlugu, aammalu NAPA-mit Qeqqata Kommunianiillu aningaasaliiffigineqartumik nammineerluni sanaartugaq sanaartornikuullugu.
Taassuma neriuutigaa illuaraasap nunaqarfimmut 100 missaanik innuttaqartumut annertunerusumik malunniutaallualerumaartoq.
- Ukiup ingerlanerata aammalu pinngortitap qaamanerata allanngorartup igalaaminermit qanoq seqersittassaneraat takussallugu illussanik titartaasartoq Sarfannguanilu najugallit qilanaarput. Tassarpiaammammi qaammatip qaamarnga allanngorarneralu illuaraasamut isumassarsiorfiunikuusoq aammalu taamaattumik taaneqarnikulluni "Qaammat", tamannalu kalaallisut qaammammik isumaqarpoq.
Igalaajusaq ilisimatusarfiusoq
Takornarissaq nunarfimmiullu illuaraasaq ukioq kaajallallugu atorluarsinnaavaat, tassami igalaat issitumut naleqqussarneqarsimapput. Pukkitsormiut marluk igalaanik ilisimatusartut igalaat issittup silaannaanut tulluarsarlugit sanasimavaat.
- Nunarsuarmioqatigiinnut kingornussassaqarfimmi ingerlatitsinermut suliniummut atatillugu suliniut una annertooq siullertut piviusunngortinneqarpoq, tamannalu novemberimi sapaatip akunnera 44-mi Nunarsuarmioqatigiinnut kingornussassanut festivaleqartitsinissamut Sarfannguini, Sisimiuni Kangerlussuarmilu ingerlanneqartussaasumut, innuttaasut annertunerusumik tusagaqarfiginissaanut tikilluaqqusaapput.
'Qaammat' oktobarip pingajuani atoqqaarfissiortinneqarpoq, tassanilu nunaqarfimmi aqutsisuni siulittaasumit Anda Berthelsen tikilluaqqusivoq. Illussanik titartaasartoq Konstantin Ikonomidis illuaraasaq ammarpaa qilersaq aappaluttup qiornerani.