Ida qanigisaminut: Ingerlariaqqissaasi
Ida Heinrich toqunissaminik akuersinera Arnaq Nielsenimut sunniuteqarnerpaasimavoq.
Aallakaatitassiaq 'Toqqorpara Uummatinnut - jeg gemmer det i mit hjerte' KNR-kkut takutinneqaqqaarneraniit qisuariaatit aaqqissuisumut Arnaq Nielsenimut imaanginnavissimapput. Taanna inunnit allaffigineqarlunilu aqqusinermi unitsinneqartarsimavoq.
- Attortinnaqaaq, taama amerlatigisunik qisuariartoqarnissaa naatsorsuutigisimanngikkaluarpara, taanna Sermitsiaq.AG-mut oqarpoq.
- Aallakaatitassiamilli aatsaat taamaattumik nunatsinni tv-kkut aallakatitsisoqarunarpoq. Toqu taama ammatigisumik oqaluuserillugu immikkuullarilluinnartuuvoq, taanna oqarpoq.
Kisiannili aamma sakkortusinnaavoq.
- Qanormi pisoqarsimaneranik eqqaasinneqarpunga.
Taamaakkaluartoq aliasunnerup anniarnerullu nalaani eqqortuliornertut misinnarpoq.
- Ikinngutiginerpaasara toqusussanngortoq taamatut inuulluaqqunissaa pissusissamisoorpasippoq. Taamatut aallakaatitassiorsimanerput tamatsinnut oqilisaataasimarpasippoq.
Ida-p akuersinera
Arnaq Nielsenip filmiliuutip siullerpamik ikinnginnerani tamanna qaammatini arlalinni eqqarsaatersuutigisarsimavaa. Tamatuma siuliani illortaani aamma nappaassuarmik kræftersimasoq annaasimavaa.
- Ida paasitinneqarmat qanoq iliortoqarsinnaajunnaartoq, toqu pillugu ammasumik oqaloqatigisinnaallugu eqqarsaammerpunga.
Arnaq Nielsenip isumassarsiani Ida Heinrichip Qooqqunut angalaqatiginerani saqqummiuppaa.
- Misiliisinnaaneralutillu oqarfigisimavaa.
Qooqquni immiussat aallakaatitassiami ilanngunneqartuni siullersaapput.
Tusagassiortup ikinngutitut apeqqutigineq ajukkani apeqqutigai.
Arnaq Nielsen marloqiusamik inissisimaleriasaarpoq, tassa ikinngutitut tusagassiortutullu. Taamatulli inisseriataarnera qulequttat oqimaatsut ajornannginnerusumik oqaluuserisinnaanngotippai.
- Naak Ida ammangaluaqisoq aammalu suulluunniit oqaluuserisinnaasaraluarlutigit “ikinngutaannartut” apeqqutigisaqanngissinnaasarpunga. Taamaaliornikkut tusagassiortutut toqu qanoq eqqarsaatersuuteqarfigineraa toqqaannartumik apeqquteqarfigisinnaavara. Naliginnaasumik taamaaliorsinnaagunanngilanga.
Naak aallakaatitassiap suliarinera oqilisitaangaluartoq pisoq suli sakkortusimavoq. Taamaammat piffissap ilaani Arnaq Nielsenip immiussinini qaammatip ataatsip iluani unitsittariaqarsimavaa.
- Ikinngutimami toqunissaa aporfiulersimavoq, taamaammat uninngatikkallartariaqarsimavara.
Aliasunnartut illaatigalugit
Aallakaatitassiarlu takungaanni suna tamarmi aliasunnartuunngilaq. Allammi aamma inissaqartinneqarput.
- Illarsimaqaagut, allaat aliasunnartut illaatigisarsimallutigit. Taamatummi ikinngutigiippugut.
Ida-p aalajangermagu Arnaq illerfimmik akiaqatassasoq, tassanngaannaq pisussamik oqaluttualiorput.
Aamma Ida rollatoritaarmat assut illartoqarpoq – taanna aallakaatitassiami ilaavoq.
- Ajornannginnerusumik toqu oqaluuserineqarsinnaanera paasivara. Tamattami qaquguluunniit toqusussaangatta toqu pineqartillugu suna tamarmi ajortuinnaasariaqanngilaq.
- Aamma toqup oqaluuserinera uannut nutaajummat qanoq oqaluuserinissaa nalusimavara. Ajornanngitsumilli toqu oqaluuserineqarsinnaavoq, Arnaq Nielsen erseqqissaavoq.
Aallakaatitassiami ingerlateqqinniagaasa ilagaat Ida Heinrichip toqusussanngorluni paasitinneqarami akuersisimanera.
- Allatut iliortoqarsinnaajunnaarnerani qanoq ingerlariaqqissanersugut taassuma sammivaa. Tassunga qanigisaanut ikinngutaanullu ajornannginnerulersitsiniarluta qanoq iliorsinnaavugut.
Iperaaneq
Ida Heinrichip ilisaanissani piareersarpaa. Aammattaaq meeqqami inissinnissaat qulakkeerniarlugu inini isumagaa.
- Isumaqarpunga taamatut piareersarsimanera meeqqaminik qanigisaminik ikinngutiminillu iperaanissaanik ajornannginnerulersitsisoq.
Qanigisanilu aamma kaammattorsimavai aamma taakku iperaassasut.
- Arlaleriarluni inuunitsinni ingerlariaqqissasugut oqaatigaa. Soorunami aliasunneq immini ajunngilaq, kisianni aliasuttuaannassanngilagut – inuuneqarpugummi.
- Taamaammat taamaaliortariaqarpugut, taassumami kissaatigisimavaa.
Aallakaatitassiaq 'Toqqorpara Uummatinnut' ataasinngormat kingullermi aallakaatinneqarpoq. Nanginneri tulliuttut sisamat ataasinngornikkut aallakaatinneqartassapput. Immikkoortoq siulleq KNR-ip nittartagaani takuneqarsinnaavoq.