Ida Heinrich pillugu aallakaatitassiaq

Ippassaq aallakaatitassiaq 'Toqqorpara Uummatinnut" - jeg gemmer det i mit hjerte' KNR-TV-kkut aallakaatinneqaqqaarpoq.

Qanorooq-mi aaqqissuisoq Arnaq Nielsn Kalaallit Nunaanni tusagassiortutut misilittangaqarluarpoq. Operamillu erinarsortartoq Ida Heinrichip naggammik aallakaatitassiarineqarnera suliaringamiuk ulluinnarni misilittagaaniit suliaq immikkuullarilluinnartuusimavoq.

Arnaq Nielsennimmi Ida Heinrich qaningisarilluinnarlugu ikinngutigisimavaa. Suliassarli immikkuullarilluinnartuungaluartoq isumaqarsimavoq aallakaatitassiaq pinngitsoorani suliarineqartariaqartoq. Toqummi ammasumik oqaluuserineqartarnissaa pingaarteqartoq, taanna isumaqarpoq.

- Nappaatiminut isiginninnera eqqissisimanerujussuuvoq taavalu imatut nikallujanani, soorunalimi nikallorfeqartarpoq kisianni akuersaarneq, maniguunneq taavalu 'allatut ajornaqaaq taamaappoq, taava tassanngaanniit ingerlariaqqissuugut' taamatut eqqarsartarnera taavalu aamma toqunissaminut piareersarnera, Ida Heinrichip ikinngutaa aallakaatitassianilu aaqqissuisuusoq Arnaq Nielsen KNR-imut oqarpoq.

Ida Heinrich 2016-imi påskip nalaani nappaassuarmik kræftimik eqqugaasimasutut paasitinneqarpoq. Taanna ukioq manna februarip qaammataani 39-nik ukioqarluni toqukkut qimaguppoq.

Aallakaatitassiami 'Toqqorpara Uummatinnut" - jeg gemmer det i mit hjerte' immikkoortoq siulleq ippassaq KNR-TV-kkut aallakaatinneqarpoq. Taanna massakkut KNR-ip nittartagaani takuneqarsinnaalereerpoq. Aallakaatitassiat tullii sisamat ataasinngornermi aallakaatinneqartassapput.

Powered by Labrador CMS