Icelandairip USA-mut angalaffissat ikilisaaffigai
Islandimiut timmisartortitseqatigiiffiat, Icelandair, suliffeqarfimmik annikillisaaleruttorpoq, tamatumalu kinguneranik USA-mut angalaffissat marluk 2020-imi aasaanerani angallassinissamit aamma atorunnaarsinneqarput.
2018-ip naaneraniilli Icelandairip amerikap avannaanut angalaffissat arfinillit aammalu Canadami Halifaximut angalasarneq matuniarlugu aalajangerpoq, check-in.dk taama ilisimatitsivoq.
- Icelandairip 2020-mi piffissarisai maanna misissorneqaleruttorput, ingerlatseqatigiiffiup angalaffigisartagaani akilersinnaassutsip pitsaanngortinnissaa aamma timmisartup Boeing 737 MAX-ip atorunnaarsinneqarneranut atatillugu kingunissat annikillisarnissaat siunertargalugit. Angalaffissat nutaat nalilersorneqarput, kisianni USA-mi San Fransiscomut aamma Kansas Citymut timmisartuussisarnerit atorunnaarnissaat aalajangerneqareerpoq, niunermut tunngaviit pissutaallutik, Icelandair tusagassiuutinut nalunaarummi ilisimatitsivoq.
Taamaalilluni uku angallaviit ukioq manna imaluunniit aappaagu matuneqassapput:
- Kansas City
- San Francisco
- Dallas/Fort Worth
- Baltimore-Washington
- Halifax (Canada)
- Cleveland
- Tampa