Icelandair timmisartortitseqatigiiffiit kattunnerannik naammassinnilersoq
Islandimi timmisartortitseqatigiiffiit Icelandair aamma Air Iceland Connect kattunnerminnik marsip 16-iani naammassinnissapput, taamaalillunilu timmisartortitseqatigiiffik siunissami Icelandairimik ateqarluni timmisartuussisalissalluni.
Islandimi timmisartortitseqatigiiffiit marluk akornanni kattunnissamik qaammatini arlalissuarni piareersarsimaneq naammassiartuaalerpoq, timmisartortitseqatigiiffiillu taakkua aappaata nunap iluani timmisartuussineq aappaatalu nunarsuup sinnerani mittarfinnut timmisartuussineq isumagisarisimavaat.
- Timmisartortitseqatigiiffiit kattunnissaanni anguniagaq tassaavoq Islandimi nunap iluani ingerlaarfinnut kiisalu nunani avannarlerni killerni niuerfeqarfinnut ingerlaarfinnut siunissamik attanneqarsinnaasumik qulakkeerinninnissaq tamatumalu peqatigisaanik ingerlatseqatigiiffimmik tamakkiisumik ingerlatsinermi nukittorsaanissaq pisariillisaanissarlu, tusagassiuutitigut nalunaarummi atuarneqarsinnaavoq.
Nioqqutip ilisarnaataa nukittooq
- Nioqqutip ilisarnaataa nukittooq, inniminneeriaaseq pisariinnerusoq siammartereriaatsillu akuleriissut tunngavigalugit Icelandair nioqqutinik kiffartuussisutinillu ataatsimoortunik timmisartortitseqatigiiffiup timmisartuussivigisartagaanut tamanut, nunap iluani nunallu tamalaat akornanni, sumiiffimmi ataatsimi katersorneqarsimasunik neqerooruteqarsinnaalerpoq taamaalillunilu sullitat misigisassaannik pitsanngorsaasinnaalerluni, oqaatigineqarpoq.
Kattunnerup ataatsimut aqutsisoqarneq, kiffartuussivinnik immikkoortortaqarneq aqutseriaaseqarnerlu eqqarsaatigalugit timmisartortitseqatigiiffik annertuumik ingerlatsinerup sunniutaanik malunnaateqarluartumik pissarsiaqartissavaa.
Icelandair nittartagaliorsimavoq, allannguutit sukumiisumik nassuiarneqarfigisaannik: uani takuuk