Timmisartuussineq
Icelandair rekortiliisoq aqqummik nutaamik ammaavoq
Icelandair aatsaat taama ilaasoqartigaaq, maannalu Keflavikimit Kansas Citymut aqqummik ammaaniarluni nalunaaruteqarpoq.
Icelandair maajip 25-anni aasaanerani aqqummik nutaamik ammaassaaq, Keflavikimi mittarfimmit Kansas Citymut, amerikami naalagaaffik naalagaaffeqatigiinni ilaasumi Missourimi inissisimasumut.
Sapaatip-akunneranut pingasoriarluni timmisartuussinerit
Icelandairip oktobarip aallaqqaataata tungaanut aqqut sapaatip-akunneranut pingasoriarluni timmisartuussiffigisarniarpaa. Ilaasut Icelandairip timmisartuisa Boeing 757-200 ilaat ilaaffigisassavaat, atuagassiaq Check-In.dk ilisimatitsivoq.
Kansas City ''illoqarfik tissaluttoqarfittut'' ilisimaneqarpoq, 200-nit ikinnerunngitsunik tissaluttoqarnini pissutigalugu ''Paris of the Plains''-itullu oqaatigineqartarluni Great Plains pissutigalugu.
Nunanit tamalaanit ilaasut rekortiliisut
Islandimiut timmisartortitseqatigiiffiata 2017-imi aatsaat taama ilaasoqartigaat, ingerlatseqatigiiffiup ilaasut nunanit tamalaaneersut 4 millioninit amerlanerusut ilaasorisimammagit.
2017-ip ingerlanerani ingerlatseqatigiiffiup timmisartuinut ilaasut katillutik 4.386.776-iupput, 92 procentiilu nunanit tamalaaneersuupput. Taamaallaammi nunap iluani angalasut 349.273-iupput.
Agguarnerat
Nunanit tamalaanit angalasut 10 procentimik amerleriarput, kiisalu nunap iluani angalasut 7 procentimik, Check-In.dk ilisimatitsivoq.