Icelandair naatsorsuutinik amigartoorujussuartunik saqqummiussivoq
Islandimi timmisartortitseqatigiiffik Icelandair 2018-imi 370 millionit koruuninik amigartooruteqarpoq. Ukiup siulianut sanilliullugu angusaq 600 millionit koruuninik ajorneruvoq.
Sinneqartooruteqarnermit amigartooruteqarnermut. Ukioq 2018 Islandimi timmisartortitseqatigiiffinnut WOW-imut aamma Icelandairimut ajorluinnarpoq, kingullertut taaneqartup naatsorsuutini saqqummiussivoq.
WOW-ip akiliisinnaajunnaannginnissani ilungersuutigalugu allanit aningaasaliisussarsiornerani, Icelandair 2017-imi 250 millionit koruuninik sinneqartooreernini 2018-imi 370 millionit koruuninik amigartoornermut mumisippaa, check-in.dk taama ilisimatitsivoq.
Ikummatissap akii qaffasissut
Europami timmisartortitseqatigiiffiit allat nassuiaatigisaat assigalugu nassuiarneqarpoq: unammilleqatigiinneq annertooq aamma ikummatissat akiisa malunnaatilimmik qaffannerat.
- 2018-imi niuernikkut ajornakusoorfiuvoq. Ukiup aallartinnerani saqqummiussatsinnit angusat annikinnerupput, sakkortuumik unammilleqatigiittoqarpoq, akit appasissut kiisalu ikummatissap akii malunnaatilimmik qaffannerat. Tamatuma saniatigut tuniniaanermi niuerfitta allanngorneri aamma angusatsinnut pitsaanngitsumik sunniuteqarput, pisortaq Bogi Nils Bogason tusagassiuutinut nalunaarummi oqarpoq.
Aaqqiinerit
Icelandairip maanna Keflavikimi mittarfimmit angalasarfiit aaqqissuutileruttorpai, ullumikkut tassanngaanniit Amerikap avannaani mittarfinnut 23-inut timmisartuussisoqartarpoq, aamma Europami tikitassanut 26-inut. Ingerlatseqatigiiffiup pigisaani Air Iceland Connectip siunissami qanoq aaqqissuunneqarnissaa isumaliutersuuteqarfigaa.